Parisdə Avropa liderlərinin təcili sammiti BAŞA ÇATDI
Parisdə Avropa ölkələrinin liderləri Rusiya və ABŞ arasında gözlənilən danışıqlardan öncə birgə fəaliyyət planını müzakirə etmək üçün təcili sammit keçirib. Görüş Fransa Prezidenti Emmanuel Makronun təşəbbüsü ilə baş tutub və Böyük Britaniya, Almaniya, Polşa, İtaliya liderləri, Avropa Komissiyasının rəhbəri Ursula fon der Lyayen və NATO Baş katibi Mark Rütte iştirak edib.
Crossmedia.az xəbər verir ki, sammitin əsas mövzuları ABŞ-nin Avropadan Ukraynaya qoşun göndərilməsini istəməsi, Avropanın müdafiə imkanlarının artırılması və təhlükəsizlik zəmanətləri, Rusiya atəşkəsi pozduğu halda Ukraynanın NATO-ya avtomatik daxil olması ehtimal olub.
Görüşün sonunda konkret qərarlar elan olunmasa da, NATO Baş katibi Mark Rütte Avropanın Ukraynaya təhlükəsizlik zəmanəti verməyə və müdafiəyə daha çox investisiya ayırmağa hazır olduğunu bildirib. O, detalları hələ müəyyənləşdirmək lazım gəldiyini, lakin "öhdəliklərin artıq aydın olduğunu" vurğulayıb.
Polşa Baş naziri Donald Tusk isə məcburi qərarların qəbul olunmadığını, lakin tərəflərin əsas məsələlərdə oxşar mövqe sərgilədiyini deyib. Böyük Britaniyanın Baş naziri Kiran Starmer Avropanın yeni dövrə girdiyini və keçmişin rahatlığından əl çəkməli olduğunu bildirib.
Almaniya kansleri Olaf Şolts isə Avropa və ABŞ arasında məsuliyyət bölgüsü ilə bağlı müzakirələri tənqid edib və Ukrayna ilə sülh danışıqları aparılmadan əvvəl belə debatların aparılmasını "uyğunsuz" adlandırıb:
"Mən bu müzakirələrdən bir qədər narahatam və bunu açıq şəkildə demək istəyirəm. Burada Ukraynalıların iştirakı olmadan, hələ başlamamış sülh danışıqlarının mümkün nəticələri müzakirə edilir. Bu, tamamilə yersizdir".
Fatimə Məmmədova
11:26 18.02.2025
Oxunuş sayı: 3044
