Parisdə Ukrayna üçün kritik görüş – Avropa liderləri hərəkətə keçdi
Fransa prezidenti Emmanuel Makronun ev sahibliyi ilə Yelisey Sarayında Ukrayna ilə bağlı fövqəladə təhlükəsizlik sammiti başlayıb.
Crossmedia.az xəbər verir ki, görüşdə Almaniya kansleri Olaf Şolz, İngiltərə baş naziri Keir Starmer, İtaliya baş naziri Giorgia Meloni, Polşa baş naziri Donald Tusk, İspaniya baş naziri Pedro Sançes, Hollandiya baş naziri Dik Şof və Danimarka baş naziri Mette Frederiksen iştirak edir.
Sammitdə həmçinin Aİ Şurasının sədri Antonio Kosta, Aİ Komissiyasının sədri Ursula fon der Leyen və NATO-nun baş katibi Mark Rutte də yer alıb.
Fransa mətbuatı Makronun ABŞ prezidenti Donald Tramp ilə sammitdən əvvəl telefon danışığı apardığını bildirsə də, Yelisey Sarayı hələlik rəsmi açıqlama verməyib.
Bu görüş, Rusiya və ABŞ arasında Ukrayna ilə bağlı diplomatik müzakirələrin intensivləşdiyi bir vaxtda baş tutur. Avropa liderləri "Ukraynada sülh Avropasız əldə oluna bilməz" mövqeyini müdafiə edirlər.
Digər tərəfdən, ABŞ və Rusiyanın yüksək səviyyəli rəsmilərinin sabah Səudiyyə Ərəbistanında müharibə ilə bağlı görüş keçirəcəyi bildirilir. Donald Tramp və Vladimir Putinin yaxın zamanda birbaşa görüş keçirəcəyi və müharibəni dayandırmaq istədikləri də qeyd olunur.
21:12 17.02.2025
Oxunuş sayı: 4144
