Rusiyanın növbəti strateji hədəfi açıqlandı: Bu, ölüm- qalım məsələsidir
Rusiya xarici işlər naziri Sergey Lavrov ABŞ nümayəndə heyəti ilə Ər-Riyadda aparılacaq danışıqlar barədə danışıb. O bildirib ki, Rusiya ilk növbədə ABŞ-ın təkliflərini dinləyəcək və liderlərə hesabat verəcək. Lavrov Avropanın Ukrayna üzrə danışıqlara mümkün iştirakına toxunaraq bəzi ölkələrin atəşkəsdən Ukraynanı hərbi cəhətdən gücləndirmək üçün istifadə etdiyini vurğulayıb. O, Ukrayna münaqişəsinin həllində ərazi güzəştlərinin mümkün olmadığını açıq şəkildə bəyan edib.
Crossmedia.az-a danışan hərbi ekspert Ramil Məmmədli bildirib ki, Kursk istiqamətində həyata keçirilən əməliyyatlar nəticəsində Ukrayna ordusunun nəzarətində olan ərazilərin təxminən 50%-i geri alınıb.
"Hazırda Rusiya Kursk istiqamətində mövqelərini möhkəmləndirir və tam nəzarəti bərpa etməyə çalışır. Eyni zamanda, Donetsk vilayətində ələ keçirdiyi ərazilərin miqyasını genişləndirmək üçün sürətli əməliyyatlar aparır. Bu addımlar danışıqlar zamanı Rusiyanın istədiyi şərtləri diktə etməsinə imkan yaratmaq məqsədi daşıyır".
Ekspertin sözlərinə görə, Moskva ələ keçirdiyi əraziləri geri qaytarmaq fikrində deyil:
"Bu, Rusiya üçün strateji ölüm-qalım məsələsidir. İstənilən hakimiyyət həmin əraziləri Ukraynaya qaytarmağa razılaşarsa, bu, ölkədə siyasi böhran və hətta dövlət çevrilişi ilə nəticələnə bilər. Tarixdə belə hadisələr bir neçə dəfə yaşanıb. Ukrayna və onun müttəfiqləri düşünürsə ki, ABŞ vasitəsilə Rusiyanı bu əraziləri qaytarmağa məcbur edə bilər, bu, reallaşmayacaq".
R. Məmmədli əlavə edib ki, Rusiyanın növbəti strateji hədəfi Xarkov istiqamətində mövqelərini gücləndirməkdir.
Fatimə Məmmədova
20:19 17.02.2025
Oxunuş sayı: 4083
