Azərbaycan və Somali arasında imzalanmış sənədlər ikitərəfli əlaqələrimizi dahada möhkəmləndirəcək
Fevralın 12-də Somali Federativ Respublikasının Prezidenti Hasan Şeyx Mahmud Bakıya rəsmi səfərdə olub. Prezident Hasan Şeyx Mahmudu rəsmi qarşılanma mərasimi ilə Azərbaycan Prezidenti İlham Əliyev qarşıladı.Somali Prezidentinin şərəfinə fəxri qarovul dəstəsi düzülmüşdü. Bu səfərin əhəmiyyətli olması ölkələrimiz arasında olan səmimi münasibət-lərin formalaşmasının göstəricisidir. Hər iki ölkə bu münasibətlərin qorunub və inkişaf etdirilməsi üçün mühüm addımlar atılmasına maraqlıdır. Azərbaycan və Somali qarşılaşdığı çağırışlarla bağlı bənzər istiqamətli və mühüm mövqelər nümayiş etdirir. Ölkələrimiz bu baxımdan ərazi bütövlüyü və suverenlik amillərini dəstəkləyir və bütün beynəlxalq tədbirlərdə bir-birinə vacib dəstək göstərirlər. Azərbaycan və Somali arasındakı münasibətlərin yalnız ikitərəfli səviyyədə deyil, həm də beynəlxalq platformalarda inkişaf etdirilməsi hər iki ölkə üçün strateji əhəmiyyət kəsb edir. Bu əməkdaşlıq təkcə iqtisadi və siyasi sahələrlə məhdudlaşmır, eyni zamanda beynəlxalq təşkilatlarda birgə təşəbbüslərin irəli sürülməsinə də imkan yaradır.
Azərbaycan üçün Somali Afrikanın inkişaf edən bazarlarına çıxış üçün strateji qapı rolu oynaya bilər. Xüsusilə, ticarət və logistika sahələrində əməkdaşlıq hər iki ölkəyə qarşılıqlı fayda gətirə bilər. Somali Qırmızı dəniz və Hind okeanı arasında yerləşdiyi üçün Şərqi Afrika və Yaxın Şərq arasında ticarət yollarında əhəmiyyətli mövqeyə malikdir. Azərbaycanın Bakı-Tbilisi-Qars dəmir yolu və digər logistika imkanları ilə birləşərək, bu marşrut yeni ticarət yolları üçün fürsət yarada bilər. Berbera və Mogadişu limanları Afrika daxilində və xaricində yükdaşımalar üçün mühüm mərkəzlərdir. Azərbaycan və Somali bu limanlar vasitəsilə yük daşımalarını inkişaf etdirə, logistika şəbəkələri qura bilər. Afrika bazarı kənd təsərrüfatı məhsulları, enerji resursları və texnologiyalar sahəsində yeni investisiyalara açıqdır. Azərbaycan kənd təsərrüfatı məhsulları, neft-kimya və digər sahələrdə Somali ilə əməkdaşlıq edə bilər.
Ticarət və logistika sahələrində Azərbaycan və Somali arasında əməkdaşlıq böyük potensiala malikdir. Azərbaycan Somali bazarına neft-kimya məhsulları, kənd təsərrüfatı məhsulları (buğda, pambıq, fındıq), içməli su və inşaat materialları ixrac edə bilər. Əvəzində isə, Azərbaycan Somali bazarından dəniz məhsulları, ət, tropik meyvələr, həmçinin bəzi təbii resurslar (duz, mədən materialları) idxal edə bilər. Qarşılıqlı münasibətlər fonunda iki ölkə arasında sənaye parkları və istehsal müəssisələrinin qurulması da mümkündür. Azərbaycan Berbera və Mogadişu Limanları vasitəsi ilə şirkətləri Afrikanın digər ölkələrinə məhsul göndərə bilər. Eyni zamanda, Bakı Beynəlxalq Dəniz Ticarət Limanı Afrika-Avropa-Asiya marşrutlarında mühüm rol oynaya bilər. Azərbaycan Şərqi Afrika və Asiya ölkələri üçün bir tranzit mərkəzi rolunu oynaya bilər. Somalidən çıxan məhsullar BTQ vasitəsilə Avropaya daşına bilər. Bakı və Mogadişu arasında hava yük daşımalarının inkişaf etdirilməsi iki ölkə arasında ticarəti daha da asanlaşdıra bilər. Azərbaycan və Somali arasında imzalanmış sənədlər ikitərəfli əməkdaşlığın daha da gücləndirilməsinə töhfə verəcək.
Pərvanə Talıbova
YAP Yasamal rayon təşkilatının fəalı
Azərbaycan Milli Konservatoriyası tərkibində İncəsənət Gimnaziyasının müəllimi
18:36 17.02.2025
Oxunuş sayı: 7647
