Ukrayna Trampla saziş imzalamaqdan çəkinir
Ukrayna Prezidenti Volodimir Zelenski Ağ Evin israrına baxmayaraq, ölkəsinin nadir yeraltı sərvətlərinin yarısını hərbi dəstək müqabilində Amerika şirkətlərinə vermək barədə razılaşmaya qol çəkməkdən imtina edib.
Crossmedia.az Politico-ya istinadən xəbər verir ki, danışıqlarla tanış olan iki mənbəyə görə, Ukrayna və ABŞ tərəfləri hələ də müqavilənin detallarını müzakirə edirlər.
“Müqavilə hələ imzalanmayıb. Tərəflər detallar üzərində işləyir,” – danışıqlarla bağlı məlumatlı olan anonim Ukrayna rəsmisi bildirib: “Hüquqşünaslar bunun üzərində işləyirlər. ABŞ-ın təqdim etdiyi layihədə, Ukraynanın nadir yeraltı sərvətlərinin 50 faizinin necə əldə olunacağı çox mürəkkəb şəkildə izah edilib.”
Rəsmi əlavə edib ki, ABŞ-ın planı Ukrayna qanunlarına zidd ola biləcəyi üçün işləməyə bilər.
Ukrayna rəhbərliyi ABŞ-ın transaksional yanaşmasını nəzərə alaraq, ölkənin mineral sərvətlərini Rusiyanın işğalına qarşı dəstək almaq üçün strateji bir amil kimi təqdim etməyə çalışır.
Tramp administrasiyasının rəsmiləri bildiriblər ki, bu müqavilə Rusiyaya ABŞ-nin Ukraynada maraqları olduğunu göstərə biləcək iqtisadi qalxan rolunu oynaya bilər.
Bundan əvvəl Tramp ABŞ-nin Ukraynaya müharibə başlayandan bəri göstərdiyi hərbi və mülki yardım müqabilində 500 milyard dollarlıq Ukrayna mineralına ehtiyac duyduğunu bildirmişdi. Bu rəqəm ABŞ-ın faktiki yardımından xeyli yüksəkdir.
Lakin müqavilə hələ yekunlaşmayıb və tərəflər son detallar üzərində işləyirlər.
“Beləliklə, Ukrayna tərəfi öz layihə versiyasını ABŞ-a təqdim edib. Onlar da bunun üzərində işləyirlər. Ukraynalılar isə Amerika təkliflərini nəzərdən keçirirlər,” – mənbə bildirib.
Danışıqlardan xəbərdar olan başqa bir şəxs Politico-ya deyib: “Amerikalılar Ukraynanın təkliflərindən razı qalmadılar.”
Bundan əlavə, ABŞ-ın təqdim etdiyi layihənin əsas problemlərindən biri də odur ki, o, Ukraynaya real təhlükəsizlik zəmanətləri vermir. Sənəddə yalnız Rusiyanın müharibəni dayandırması müqabilində ABŞ qoşunlarının mineral ehtiyatlarını qorumaq üçün yerləşdirilə biləcəyi qeyd olunur.
Zelenski Münhen Təhlükəsizlik Konfransında bu məsələni vurğulayaraq bildirib ki, nadir yeraltı sərvətlərlə bağlı razılaşma hələ hazır deyil.
“Biz bunu investisiya kimi müzakirə etməliyik və düzgün şəkildə formalaşdırmalıyıq,” – deyə Zelenski Münhendə jurnalistlərə bildirib. “Həmçinin qazancın necə bölünəcəyi barədə düşünə bilərik,” – o əlavə edib.
"Bütün bunlar təhlükəsizlik zəmanətləri ilə əlaqələndirilməlidir," – deyən Ukrayna lideri vurğulayıb. "Lakin hələ ki, sənəddə bu əlaqəni görmürəm".
Nabat Fərzəliyeva
05:51 16.02.2025
Oxunuş sayı: 7769
