ABŞ-nin xüsusi nümayəndəsi: Ukraynanın ərazi itkisi xüsusi sazişdə təsbit ediləcək
ABŞ-nin Ukrayna üzrə xüsusi nümayəndəsi Kit Kelloq Ukraynanın ərazi itkisini nəzərdə tutan xüsusi sazişin imzalanacağını bildirib.
Crossmedia.az xəbər verir ki, o, bu barədə Fox News-a müsahibəsində danışıb.
"Hesab edirəm ki, potensial ərazi itkisi ilə bağlı müəyyən bir saziş olacaq. Amma bunu mütləq tanımaq məcburiyyətində deyilsiniz", – deyə Kelloq vurğulayıb.
O, ABŞ-nin Baltikyanı ölkələrə dair keçmiş mövqeyini xatırladaraq qeyd edib ki, Vaşinqton Sovet İttifaqının bu region üzərində suverenliyini heç vaxt tanımayıb.
"Sovet İttifaqı Baltikyanı ölkələri ələ keçirdikdə, biz heç vaxt onların bu ölkələrə sahib olduqlarını deməmişik. Sadəcə onların SSRİ-nin hakimiyyəti altında olduqlarını bildirmişik", – deyə Trampın nümayəndəsi izah edib.
Kelloq ərazi məsələsinə uzunmüddətli perspektivdən baxmağın vacibliyini vurğulayıb və sülh üçün dayanıqlı təhlükəsizlik razılaşmasının əsas olduğunu bildirib. "Həqiqətən stabil və uzunmüddətli təhlükəsizlik razılaşmasına əsaslanan bir sülh lazımdır", – deyə o əlavə edib.
Nigar Yahyazadə
14:45 14.02.2025
Oxunuş sayı: 2798
