Gürcüstanın XİN: Ölkəmizi qurban verə bilmərik
Gürcüstanın xarici işlər naziri Maka Boçorişvili ölkəsinin ciddi çağırışlarla üzləşdiyini və Brüsseldən xoş sözlər eşitmək naminə ölkəni qurban verə bilməyəcəyini bildirib.
Crossmedia.az xəbər verir ki, bu barədə Gürcüstan mediası məlumat yayıb.
"Biz ölkəmizi və onun maraqlarını qorumaq məcburiyyətindəyik. Ukrayna ətrafında baş verənlər bizə niyə məhz öz ölkəmizə qayğı göstərməli olduğumuzu açıq şəkildə göstərir. İlk növbədə, çıxış nöqtəmiz ölkəmizin gələcəyi olmalıdır, yoxsa hansısa Avropa Parlamentinin deputatının qətnamədə nə yazacağı deyil", – Boçorişvili vurğulayıb.
O, həmçinin Avropa Parlamentinin (AP) qəbul etdiyi qətnamənin sağlam məntiqdən, demokratiyadan və Avropa dəyərlərindən uzaq olduğunu bildirib.
Qeyd edək ki, AP Gürcüstanla bağlı qətnamə qəbul edib. Sənəddə "Gürcü arzusu" partiyası ilə əlaqəli məmurlara qarşı sanksiyaların tətbiqi, hazırkı hakimiyyətin tanınmaması və ölkədə yeni parlament seçkilərinin keçirilməsi tələb edilir.
Fatimə Məmmədova
13:15 14.02.2025
Oxunuş sayı: 2651
