Azərbaycanın beynəlxalq aktorlarla əlaqələrini genişləndirməsi ölkənin qlobal siyasətdəki rolunu möhkəmləndirir
Azərbaycan Respublikasının Prezidenti İlham Əliyev Davosda keçirilən Dünya
İqtisadi Forumu çərçivəsində Çinin CGTN telekanalına müsahibə verib. Bu
müsahibədə Azərbaycanın beynəlxalq siyasəti, iqtisadi inkişafı və strateji
əməkdaşlıq məsələləri geniş müzakirə edilib.Prezident İlham Əliyev Azərbaycanın
beynəlxalq hüquqa əsaslanaraq öz ərazi bütövlüyünü bərpa etdiyini vurğulayıb.
O, 44 günlük Vətən müharibəsi və 2023-cü ildə Qarabağda keçirilən antiterror
tədbirləri nəticəsində ölkəmizin suverenliyini tam təmin etdiyini bildirib.
Dövlət başçısı həmçinin post-münaqişə dövründə bölgədə sülh və təhlükəsizliyin
qorunmasının Azərbaycanın əsas prioritetlərindən biri olduğunu qeyd edib.
Müsahibədə Prezident İlham Əliyev Azərbaycanın Cənubi Qafqaz və Xəzər
regionunda sabitlik və inkişafın əsas təminatçılarından biri olduğunu qeyd
edib. Azərbaycanın strateji coğrafi mövqeyi, enerji resursları və nəqliyyat infrastrukturu
ölkəmizi beynəlxalq əməkdaşlıq üçün etibarlı tərəfdaşa çevirir. Dövlət başçısı
Azərbaycanın beynəlxalq enerji layihələrində – o cümlədən Cənub Qaz Dəhlizi və
Bakı-Tbilisi-Ceyhan neft kəməri kimi layihələrdə mühüm rol oynadığını
vurğulayıb.
Prezident İlham Əliyev Azərbaycanın Ümumdünya Ticarət Təşkilatına (ÜTT)
üzvlük məsələsinə də toxunub. O, bu prosesin uzunmüddətli və kompleks olduğunu
bildirib. Azərbaycanın ÜTT-yə qoşulması ölkə iqtisadiyyatının dünya bazarlarına
daha geniş inteqrasiyasına şərait yaradacaq və xarici investorlar üçün yeni
imkanlar açacaq. Müsahibədə Azərbaycan və Çin arasında əlaqələrin yüksək
səviyyədə olduğu vurğulanıb. İki ölkə arasında imzalanmış strateji tərəfdaşlıq
üzrə Bəyannamə ikitərəfli əməkdaşlığın genişləndirilməsi üçün mühüm addımdır.
Prezident İlham Əliyev "Bir Kəmər, Bir Yol" təşəbbüsü çərçivəsində
Azərbaycanın Çin ilə əməkdaşlığının əhəmiyyətini xüsusi qeyd edib və iki ölkə
arasında ticarət və investisiya əlaqələrinin getdikcə artdığını bildirib.
Dövlət başçısı Azərbaycanın Şanxay Əməkdaşlıq Təşkilatı (ŞƏT) ilə çox yaxşı və
dost münasibətlərə malik olduğunu bildirib. Azərbaycan bu təşkilat çərçivəsində
Asiya ölkələri ilə iqtisadi və diplomatik əlaqələrini genişləndirir. ŞƏT-ə üzv
ölkələrlə əməkdaşlıq Azərbaycanın regional və qlobal arenada nüfuzunun
artmasına xidmət edir. rezident İlham Əliyevin CGTN telekanalına müsahibəsi
Azərbaycanın beynəlxalq mövqeyini və strateji tərəfdaşlıqlarını bir daha
təsdiqləyib. Azərbaycanın beynəlxalq hüquq çərçivəsində ərazi bütövlüyünü təmin
etməsi, regional və qlobal arenada güclü mövqeyə sahib olması və Çin, ÜTT və
ŞƏT kimi beynəlxalq aktorlarla əlaqələrini genişləndirməsi ölkənin qlobal
siyasətdəki rolunu möhkəmləndirir. Bu istiqamətdə atılan addımlar Azərbaycanın
gələcək inkişafı və beynəlxalq əməkdaşlığının güclənməsi üçün mühüm əhəmiyyət
daşıyır.
Fərid Mustafayev
YAP Yasamal rayon Elm və Təhsil Nazirliyinin Torpaqşünaslıq və Aqrokimya İnstitutu üzrə ərazi partiya təşkilatının sədr müavini
11:00 14.02.2025
Oxunuş sayı: 5563
