Beynəlxalq Kitab Bağışlama Günü
Təsəvvür edin, bir kitab oxuyursunuz. Səhifələri çevirdikcə yeni dünyalar kəşf edir, fərqli insanlarla tanış olur, zaman və məkan anlayışını unudursunuz. Sonuncu səhifəni bağlayanda isə artıq özünüzü daha yaxşı hiss edirsiniz – sanki bu kitab sizə dost olub, sizə nəsə öyrədib və bir parça da olsa, sizi dəyişib. İndi isə onu başqasına bağışlayır və ona da bu hissləri yaşamaq fürsəti verirsiniz. Əslində, bunu hər zaman edə bilərik. Oxuduğumuz və bizə dəyər qatan kitabları başqaları ilə paylaşmaq, onları yeni oxucularla tanış etmək mümkündür. Lakin bu gözəl ənənəni xüsusi edən bir tarix var – Beynəlxalq Kitab Bağışlama Günü.
14 fevral tarixi kitab oxumağın və paylaşmağın insanları birləşdirən gücünü vurğulayır, bilik və mütaliəyə olan sevgini təşviq edir.
Beynəlxalq Kitab Bağışlama Günü (“International Book Giving Day”) ilk dəfə 2012-ci ildə ABŞ-da kitabsevərlər tərəfindən qeyd edilib. Bu bayramın təşəbbüskarı ABŞ-da məşhur “Delightful Children’s Books” uşaq kitabı saytının yaradıcısı Emmi Brodmoordur. Maraqlıdır ki, bu ideya ona balaca oğlundan gəlib. O, anasından niyə insanların bir-birinə kitab bağışladığı xüsusi bir günün olmadığını soruşub.
2013-cü ildə Cənubi Afrikadan Braziliyaya, Sinqapurdan İngiltərəyə, Hindistandan Yeni Zelandiyaya qədər müxtəlif ölkələrdən olan blogerlər bir araya gələrək insanları bu günü “Uşaqlara Kitab Bağışlama Günü” kimi qeyd etməyə çağırıblar. Bununla da dünyanın bir çox ölkəsində 14 fevral kitab sevgisini paylaşmaq üçün xüsusi bir tarixə çevrilib. Artıq bu gün təkcə uşaqlar üçün deyil, bütün kitabsevərlər üçün xüsusi bir bayrama çevrilib.
Kitablar təkcə kağız və mürəkkəbdən ibarət deyil. Onlar duyğular, düşüncələr və xəyallardır. Onları bölüşmək isə insanlara dünyanın ən gözəl hədiyyəsini vermək deməkdir. Unutmayaq ki, sevgi sözlərlə yaşayır, kitablarla əbədiləşir. Beləliklə, gəlin bu günü xüsusi edək – sevdiklərimizə kitab bağışlayaq!(azərtac)
09:15 14.02.2025
Oxunuş sayı: 11139
