Azərbaycanın güclənməsi təkcə ölkə üçün deyil, bütövlükdə region üçün vacibdir
Son dövrlərdə bilik, texnologiya və təcrübələrin transformasiyası sahəsində fəaliyyətimizi genişləndirmişik.
Son illər Azərbaycan beynəlxalq aləmdə öz mövqelərini əhəmiyyətli dərəcədə möhkəmləndirərək, həm regionda, həm də onun hüdudlarından kənarda öz maraqlarını fəal şəkildə müdafiyə etməyə davam edir. Cənab Prezident İlham Əliyevin Davosda keçirilən Dünya İqtisadi Forumunda CGTN (China Global Television Network) telekanalına verdiyi müsahibədə, ölkədə mövcud siyasi və iqtisadi vəziyyəti, eləcə də strateji niyyətləri əks etdirən əsas məqamlar səsləndirilib. Bu amillər, Azərbaycanın beynəlxalq hüquqa və müxtəlif tərəfdaşlarla əməkdaşlığa istinad olunaraq, mövqeyimizin necə gücləndiyini göstərir. Bu müsahibə Azərbaycanın hazırkı və gələcək vəziyyətini ciddi təhlil etmək üçün perspektivlər açır.
Azərbaycanın ən mühüm nailiyyətlərindən biri, beynəlxalq hüquq normaları əsasında həyata keçirilən ərazi bütövlüyünün bərpası olmuşdur. Dövlətimizin Başçısı bu prosesin daxili sabitliyi möhkəmləndirməklə yanaşı, ölkəmizin beynəlxalq aləmdə imicini yüksəltdiyini vurğuladı. Həqiqətən də, işğal olunmuş ərazilər üzərində nəzarətin bərpası inkişaf və qlobal iqtisadiyyata inteqrasiya üçün yeni imkanlar açıb ki, bu da Azərbaycanın beynəlxalq norma və standartlara əməl etmək əzmini nümayiş etdirir.
Geosiyasət baxımdan, Azərbaycan etibarlı mövqe tutur. Dövlətimizin Cənubi Qafqaz və Xəzər regionunda mövqeyini təhlil edərkən görmək olar ki, ölkə enerji resursları üçün mühüm tranzit dəhlizinə çevrilir. Təkmilləşdirilmiş infrastruktur və strateji layihələrlə Azərbaycan əsas enerji təchizatçısı kimi mövqeyini möhkəmləndirir. Mövcud əməkdaşlıq sazişləri Azərbaycanın Avropanı Mərkəzi Asiya və Çinlə birləşdirən logistika qovşağı kimi mövqeyini gücləndirir. Bu amil təchizat marşrutlarının şaxələndirilməsi və enerji axınlarının təhlükəsizliyinin gücləndirilməsi istiqamətində artan qlobal tendensiyalar fonunda xüsusi əhəmiyyət kəsb edir.
Azərbaycanın Ümumdünya Ticarət Təşkilatına (ÜTT) daxil olması da mühüm müzakirə mövzusuna çevrildi. Bu proses ciddi hazırlıq və islahatlar tələb edir. Azərbaycanın ÜTT-a daxil olması prosesi qlobal iqtisadiyyata inteqrasiya yolunda mühüm addımdır. ÜTT-yə üzvlük beynəlxalq bazarlara çıxışı asanlaşdıracaq ki, bu da öz növbəsində yerli iqtisadiyyatın rəqabət qabiliyyətini gücləndirəcək. ÜTT-yə daxil olmaq həm də Azərbaycanın azad ticarət prinsiplərinə və investorların hüquqlarının qorunmasına sadiqliyinə işarədir ki, bu da əlavə xarici investisiyaları cəlb edəcəkdir. Qlobal iqtisadiyyata uğurlu inteqrasiya ölkənin gələcək inkişafı və əhalinin həyat səviyyəsinin yüksəldilməsi istiqamətində mühüm addım olacaqdır.
Azərbaycanın beynəlxalq siyasətində əsas məqam Çinlə strateji tərəfdaşlıq haqqında Bəyannamənin imzalanması oldu. Bu saziş iqtisadi və siyasi əməkdaşlıq üçün yeni üfüqlər açır. Azərbaycan qlobal iqlim dəyişikliyi kontekstində xüsusilə aktual olan yaşıl enerji sahəsində Çin investisiyalarından və texnologiyalarından faydalana bilər. Strateji tərəfdaşlıq həmçinin infrastruktur sahəsində daha sıx əməkdaşlığı ehtiva edir ki, bu da nəqliyyat əlaqələrini yaxşılaşdıracaq və yeni iş yerləri yaradacaq.
Şanxay Əməkdaşlıq Təşkilatı (ŞƏT) ilə əlaqələrin fəal inkişafı da Azərbaycanın çoxtərəfli münasibətlərə doğru strateji kursunu təsdiqləyir. 2022-ci ildə Azərbaycan ŞƏT-in müşahidəçi üzvü olub ki, bu da regionda təhlükəsizlik və iqtisadi inkişaf məsələlərinin müzakirəsində iştirak etmək imkanı yaradır. Bu əməkdaşlıq Azərbaycanın siyasi təsirini gücləndirməyə kömək edir, həmçinin ona terrorizm və transmilli cinayətkarlıqla mübarizə təşəbbüslərində iştirak etməyə imkan verir.
Ekoloji davamlılığa və yaşıl texnologiyaların inkişafına vurğu eyni dərəcədə vacibdir. Cənab İlham Əliyev qeyd etdi ki, Azərbaycan günəş və külək enerjisi layihələrinə fəal şəkildə sərmayə qoyur. 2027-ci ilə qədər iki giqavat günəş və külək enerjisi, 2030-cu ilə qədər isə altı giqavat enerji istehsalına nail olmaq planlaşdırılır. Bu təşəbbüslər qlobal tendensiyalara uyğundur və daxili ehtiyaclara cavab verir, qalıq yanacaqlardan asılılığı azaldır və davamlı inkişafı təmin edir.
Yekun olaraq, cənab İlham Əliyevin müsahibəsi təkcə əldə edilmiş nəticələri deyil, həm də dövlətin qarşısına qoyduğu strateji hədəfləri vurğulayır. Azərbaycan beynəlxalq hüquq və strateji tərəfdaşlıq prinsiplərinə istinad edərək, beynəlxalq aləmdə inamlı mövqe tutur. Ölkə düzgün xarici siyasətin və beynəlxalq aləmdə fəal addımların necə mühüm uğurlara gətirib çıxara biləcəyini nümayiş etdirir. Ərazi bütövlüyünün bərpası, beynəlxalq strukturlara fəal inteqrasiya və strateji tərəfdaşlıq gələcək inkişaf üçün möhkəm zəmin yaradır. Qlobal çağırışlar kontekstində Azərbaycanın siyasi təsirini və iqtisadi artımını gücləndirmək üçün ciddi perspektivlər var ki, bu da təkcə ölkə üçün deyil, bütün region üçün vacibdir.
Masil Dəmirov
YAP Yasamal rayon təşkilatının fəal üzvü
11:39 13.02.2025
Oxunuş sayı: 13423
