Yaşıl enerji körpüsü: Azərbaycan Çini və Avropanı birləşdirir
Azərbaycan ilə Çin arasında iqtisadi əlaqələr yeni mərhələyə qədəm qoyur. Çin şirkətləri yalnız texnologiya və xidmət sahələrində deyil, birbaşa investisiya yatırmaqda da maraqlıdır. Prezident İlham Əliyev Davosda Çin televiziyası CGTN-ə müsahibəsində bildirib ki, COP29 çərçivəsində Azərbaycan, Qazaxıstan və Özbəkistan arasında Xəzər dənizinin dibi ilə enerji kabelinin çəkilməsi barədə müqavilə imzalanıb. Bu layihə Mərkəzi Asiya ölkələri ilə Azərbaycan arasında yaşıl enerji axınını təmin edəcək və potensial olaraq Çini də bu enerji şəbəkəsinə qoşacaq.
Bundan əlavə, Azərbaycandan Avropaya Qara dəniz vasitəsilə yaşıl enerji kabelinin çəkilməsi də planlaşdırılır. Prezident İlham Əliyevin sözlərinə görə, Azərbaycanın külək və Günəş enerjisi potensialı gözləniləndən qat-qat artıqdır və bu resursların ixracı ölkənin beynəlxalq enerji bazarındakı rolunu gücləndirəcək.
Deputat Vüqar Bayramov Crossmedia.az-a açıqlamasında bildirib ki, Çin şirkətlərinin Azərbaycana marağı son illərdə əhəmiyyətli dərəcədə artıb: “Çin şirkətlərinin Azərbaycanın iqtisadiyyatına marağı təbii ki, artmışdır və biz son dövrlərdə Çindən Azərbaycana daha çox sərmayənin cəlb edilməsini müşahidə edirik. Eyni zamanda, Çin ilə Azərbaycan arasında mühüm əməkdaşlıq sazişi imzalanmışdır ki, bu da ölkələr arasında ticarət dövriyyəsinin artmasına və qarşılıqlı münasibətlərin inkişafına səbəb olmuşdur. Turizm sahəsində geniş əməkdaşlıq mövcuddur və bu əməkdaşlığın daha da gücləndirilməsi üçün işlər aparılır”.
Deputat həmçinin Xəzər və Qara dəniz vasitəsilə həyata keçirilən enerji layihələrinin regional və beynəlxalq enerji təhlükəsizliyi baxımından mühüm əhəmiyyət daşıdığını vurğulayıb: “Xəzər dənizi və Qara dəniz vasitəsilə enerji layihələrinin reallaşdırılması Azərbaycan, Gürcüstan və Mərkəzi Asiya ölkələrinin yaşıl enerjisinin Avropaya ixracı baxımından vacib addımdır. Artıq Rumıniya, Macarıstan, Gürcüstan və Azərbaycan arasında müvafiq saziş imzalanmış və Azərbaycan yaşıl enerjini Avropa bazarına çıxarmaq niyyətindədir. Gözlənilir ki, bu şəbəkəyə Qazaxıstan və Özbəkistan da qoşulacaq”.
Azərbaycanın Avropa bazarına daha çox alternativ enerji mənbələri ilə çıxmaq hədəfi ölkənin iqtisadi gücünü artıracaq və beynəlxalq mövqeyini gücləndirəcək.
“Bu layihələr Azərbaycanın iqtisadi qüdrətinin artmasına və mövqeyinin daha da güclənməsinə səbəb olacaq. Eyni zamanda, ölkənin regional nüfuzunun artmasına və Azərbaycanın regional enerji təhlükəsizliyində rolunun yüksəlməsinə gətirib çıxarır. Bütün bu addımlar Azərbaycanın imkanlarının genişlənməsinə, strateji əməkdaşlıqların möhkəmlənməsinə və regiondakı mövqeyinin daha da dərinləşməsinə xidmət edir”. – deyə deputat əlavə edib.
Maral Şahverdili
17:11 12.02.2025
Oxunuş sayı: 8332
