İsrail Fələstində qeyri-qanuni yaşayış məntəqəsi inşa edir
"İsrail Beytlahim şəhərinin Bittir kəndi ərazisində yeni yaşayış məntəqəsinin tikintisinə başlayıb".
Crossmedia.az xarici KİV-ə istinadən xəbər verir ki, bunu Yəhudi Məskənləri ilə Mübarizə Komitəsinin sədri, Müəyyəd Şaban bildirib.
Şabanın sözlərinə görə, bu addımın əsas məqsədi Qüds və Beytlahim arasındakı əlaqəni daha da zəiflətməkdir. Yeni məskunlaşma ərazisinə “Nahal Helitz” adı verilib.
O, bu layihənin İsrailin “Böyük Qüds” planının tərkib hissəsi olduğunu və Qərb Sahilinin şimalı ilə cənubu arasındakı coğrafi əlaqəni tamamilə kəsməyə yönəldiyini vurğulayıb.
Şaban qeyd edib ki, bu addım Fələstin dövlətinin 2024-cü ilin iyununda bir çox ölkə tərəfindən tanınmasına cavab olaraq atılıb. İsrail bu layihə üçün əvvəlcə 120, daha sonra isə 600 hektar Fələstin torpağına əl qoyub.
Rəsmi İsrail məlumatlarına görə, işğal olunmuş Qərb Sahilində, o cümlədən Şərqi Qüdsdə zorla müsadirə edilən Fələstin torpaqlarında 720 mindən çox silahlı israilli məskunlaşıb.
20:41 11.02.2025
Oxunuş sayı: 4256
