Rusiya hərbi gəmiləri Suriyanı tərk edib
SPARTA II və SPARTA adlı iki Rusiya yük gəmisi Suriyadakı Tartus hərbi-dəniz bazasını tərk edib. Bu strateji baza Rusiyanın bölgədəki əsas mövqelərindən biri hesab olunur.
Crossmedia.az xəbər verir ki, bu barədə xarici KİV məlumat yayıb.
Gəmilərin Rusiya Hərbi Dəniz qüvvələrinə məxsus dörd döyüş gəmisi ilə müşayiət olunduğu və yüklərinin evakuasiya edilmiş hərbi avadanlıq və şəxsi heyət olduğu bildirilir. Belə ki, bu yük başqa bir bazaya, Aralıq dənizindən uzaq bir əraziyə daşınır.
Britaniya kəşfiyyatı bildirir ki, Kreml Suriya hökuməti ilə ölkədəki hərbi bazalarının gələcəyi ilə bağlı müzakirələri davam etdirir. Rusiya Suriyanın yeni rəhbərliyi ilə münasibətləri inkişaf etdirmək və bölgədə nüfuzunu qorumaq üçün diplomatik səylərini artırır.
Lakin, Moskva bu danışıqlarda zəif mövqedədir. Buna səbəb Suriya hakimiyyətinin keçmiş prezident Bəşər Əsədə qarşı mənfi münasibəti və Rusiyanın onu qorumasıdır.
Böyük Britaniya Müdafiə Nazirliyi hesab edir ki, Rusiya üçün əsas prioritet hələ də Ukraynadakı münaqişədir. Bununla belə, Kreml Aralıq dənizinin şərqində hərbi mövcudluğunu qorumağı strateji məqsəd kimi saxlayır.
Məlumata görə, Ukraynada davam edən müharibə Rusiyanın Suriya ilə bağlı vəziyyəti tam nəzarətdə saxlamasına mane olub. Nəticədə, Moskvanın Əsəd rejimini dəstəkləmək qabiliyyəti zəifləyib və bu, Rusiyanın Yaxın Şərq, Aralıq dənizi və Afrika regionlarındakı maraqlarına zərbə vurub.
Fatimə Məmmədova
18:54 10.02.2025
Oxunuş sayı: 4879
