Boris Conson: Qərb Ukraynaya təhlükəsizlik zəmanətləri verməlidir
Böyük Britaniyanın sabiq baş naziri Boris Conson hesab edir ki, Ukrayna Qərbdən real təhlükəsizlik zəmanətləri almasa, müharibə Rusiya prezidenti Vladimir Putinin “qələbəsi” ilə başa çatacaq.
Crossmedia.az xəbər verir ki, o, bu fikrini Daily Mail üçün yazdığı məqalədə bildirib.
Consona görə, Qərb indi Putini öz qətiyyəti ilə “şoka salmalıdır” və bunu etmək üçün ən uyğun şəxs ABŞ-ın yeni prezidenti Donald Trampdır. O, Ukraynanın Qərbin bir hissəsi kimi qorunmasının vacibliyini vurğulayıb və əks halda, Rusiyanın Kiyevi zəiflətmək və ölkəni nəzarətə qaytarmaq üçün bütün vasitələrdən istifadə edəcəyini qeyd edib.
Conson bildirib ki, Ukraynaya silah tədarükündəki bürokratik maneələr aradan qaldırılmalıdır. Həmçinin, ABŞ-ın dəstəyinin qarşılığında kompensasiya ala biləcəyini, məsələn, nadir metallar üzrə sazişlər və ya Rusiyanın dondurulmuş aktivlərinin Ukraynanın bərpasına yönləndirilməsini təklif edib.
O vurğulayıb ki, Avropa atəşkəsdən sonra Ukraynanın müdafiəsinə hazır olmalı və onun NATO və Aİ-yə üzvlüyünün qaçılmaz olduğunu qəbul etməlidir.
Qeyd edək ki, Ukrayna prezidenti Volodimir Zelenski isə bəyan edib ki, ölkənin NATO-ya üzvlüyü müharibədən sonrakı ən etibarlı təhlükəsizlik zəmanətidir və Kiyev “kağız üzərində yazılmış” zəmanətlərlə kifayətlənməyəcək.
Gültac Mehdizadə
21:45 09.02.2025
Oxunuş sayı: 9533
