Donald Trampın Ukraynada barış planının sızdırıldığı iddia edilir
ABŞ Prezidenti Donald Trampın Ukrayna ilə bağlı hazırladığı barış planının sızdırıldığı iddia edilib.
Crossmedia.az Ukrayna mətbuatında yayılan xəbərlərə görə, bu plan, Ukraynanın NATO-ya qatılmaqdan imtina etməsi və işğal altındakı torpaqların Rusiyanın hakimiyyətini tanıması şərtlərini özündə birləşdirir.
Sızdırıldığı iddia edilən planın detalları arasında Ukraynanın Rusiyanın işğal etdiyi torpaqlarda hakimiyyətini tanıması və NATO üzvlüyü planından geri çəkilməsi yer alır. Planın digər maddələrinə görə, 20 aprelə qədər atəşkəs əldə olunacaq və tərəflər arasında tampon bölgə yaradılacaq. Avropa ölkələri isə bu bölgədə hərbi nəzarət saxlayacaq.
Həmçinin, plan, Avropa İttifaqının Ukraynanın bərpası üçün növbəti 10 il ərzində 450 milyard avrodan çox yardım etməsini nəzərdə tutur.
Planın müzakirə prosesində fevral ayında Rusiya Prezidenti Vladimir Putin və Ukrayna Prezidenti Volodimir Zelenski arasında telefon danışığı, mart ayının sonunda isə üz-üzə görüş keçirilməsi planlaşdırılır. 20 aprelə qədər atəşkəsin qüvvəyə minməsi, 9 mayda isə tərəflərin razılaşmalarını açıqlamaları gözlənilir.
Lakin bu plan, Ukrayna Prezidentinin qırmızı xəttlərini aşır. Zelenski, hər hansı bir barış anlaşmasında işğal edilmiş torpaqların, o cümlədən Krımın, Ukraynaya geri qaytarılmasını tələb edir. Eyni zamanda, Ukrayna NATO-ya üzv olmaq arzusundan da imtina etməyə hazır görünmür.
Fidan Hacızadə
16:16 08.02.2025
Oxunuş sayı: 7043
