Putin fırıldaqçılığa qarşı tədbirlərin gücləndirilməsini tapşırdı
Rusiya Prezidenti Vladimir Putin telefon fırıldaqçılığına qarşı tədbirlərin görülməsini tapşırıb. Belə ki, Ukrayna və digər "dost olmayan" ölkələrdən gələn dələduz zənglərinin bloklanması məsələsi gündəmə gətirilib.
Crossmedia.az xəbər verir ki, bu barədə TASS məlumat yayıb.
Prezidentin göstərişinə əsasən, müasir informasiya-kommunikasiya texnologiyalarından istifadə edərək vətəndaşların hüquqlarına qəsd edən cinayətkar fəaliyyətlərin qarşısının alınması üçün tədbirlər hazırlanmalıdır.
Bundan əlavə, dövlət qurumları və təşkilatların istifadə etdiyi telefon nömrələrinin identifikasiyasının yaxşılaşdırılması ilə bağlı təkliflər təqdim olunacaq. Beləliklə, vətəndaşların telefon ekranında həmin təşkilatların məlumatları daha aydın görünə biləcək.
Qeyd edək ki, işlərin 1 iyul 2025-ci il tarixinədək yekunlaşdırılması nəzərdə tutulur.
Fatimə Məmmədova
14:38 08.02.2025
Oxunuş sayı: 3430
