ABŞ İsrailə 3000 ədəd “Hellfire” raketi tədarük edəcək
ABŞ ilə İsrail arasında imzalanan yeni silah müqaviləsinə 3000 ədəd AGM-114 “Hellfire” raketinin tədarükü də daxildir. “Axios”un məlumatına görə, raketlərin İsrailə çatdırılması 2028-ci ildə başlayacaq.
Crossmedia.az xarici KİV-ə istinadən xəbər verir ki , AGM-114 “Hellfire” raketləri ABŞ-ın “Lockheed Martin” şirkəti tərəfindən istehsal olunur. Yarı aktiv lazerlə idarə edilən və radarla təchiz olunan bu “hava-yer” tipli döyüş raketləri əsasən helikopterlər və pilotsuz uçuş aparatları (PUA) üçün nəzərdə tutulub. Tank və gəmi əleyhinə istifadəsi ilə tanınan bu raketlərin son modifikasiyası zirehli avtomobillərə də quraşdırıla bilir. Onun maksimal hədəf vurma məsafəsi 8 kilometrdir.
“Hellfire” raketinin əsas texniki xüsusiyyətləri:
• Xidmətə qəbul tarixi: 1985
• Tip: Hava-yer tipli döyüş raketi
• Başlıq sistemi: Yarı aktiv lazer (IIR və ya RF/IR)
• Döyüş başlığı: 8 kq (HEAT - yüksək partlayıcılı tank əleyhinə)
• Effektiv mənzil: 500-8000 metr
• Uzunluq: 1,63 metr
• Çap: 178 mm
• Qanad uzunluğu: 33 sm
• Ağırlıq: 45 kq
Döyüş istifadəsi
“Tank qatili” kimi tanınan AGM-114 “Hellfire” ilk dəfə 1991-ci ildə “Körfəz müharibəsi” zamanı geniş şəkildə istifadə olunub. İndiyədək 65 min ədəd istehsal edilən bu raketlər NATO ölkələrinin arsenalında da geniş yer tutur.
08:22 08.02.2025
Oxunuş sayı: 5946
