İsveçdə məktəb hücumuna etiraz: “İrqçiliyi görməzdən gəlirlər”
İsveçin Örebro şəhərində məktəbə edilən hücuma görə, paytaxt Stokholmda etiraz aksiyası keçirilib.
Crossmedia.az xarici mediaya istinadən xəbər verir ki, Segel Torg Meydanında “Hamıya Ədalət” dərnəyinin təşkil etdiyi nümayişdə ölkədə artan irqçiliyə qarşı tədbirlər görülməsi tələb olunub.
Təşkilatçılar bəyanatlarında səlahiyyətlilərin hücumçunun ağdərili İsveç vətəndaşı olması səbəbilə onu “ruhi xəstə” kimi təqdim etdiklərini bildiriblər. Onlar hücumun müsəlman biri tərəfindən törədildiyi halda “terror” kimi qiymətləndiriləcəyini vurğulayıblar.
Bəyanatda həmçinin qeyd olunub ki, öldürülənlərin mühacir əsilli olması səbəbindən 4 gün keçməsinə baxmayaraq kimlikləri açıqlanmayıb. Aksiya iştirakçıları nifrət və ayrı-seçkiliyə qarşı mübarizənin davam edəcəyini bildiriblər.
Rəsmi məlumata görə, hadisə zamanı hücumçunun da daxil olduğu 11 nəfər həyatını itirib. Hücumçunun 35 yaşlı İsveç vətəndaşı Rickard Andersson olduğu açıqlanıb.
04:51 08.02.2025
Oxunuş sayı: 3072
