ABŞ İran neftini Çinə daşıyan şirkətlərə sanksiya tətbiq edib
ABŞ-nin Xəzinə Nazirliyinə bağlı Xarici Aktivlərə Nəzarət İdarəsi (OFAC) İrandan Çinə milyonlarla barel neftin daşınmasını həyata keçirən şirkət və şəxslərə qarşı sanksiya tətbiq edib. Sanksiya siyahısına Çin, Hindistan və Birləşmiş Ərəb Əmirliklərində fəaliyyət göstərən bəzi şirkətlər və fərdlər daxil edilib. Siyahıda həmçinin İrandan Çinə neft daşınmasını asanlaşdıran şəxslər, ekipaj idarəetmə şirkətləri və gəmilər yer alır.
Bu addım ABŞ prezidenti Donald Trampın dövründə tətbiq olunan “Maksimum Təzyiq” siyasətinin yenidən gündəmə gələ biləcəyi ilə bağlı müzakirələrə səbəb olub. İran hökuməti Vaşinqtonun sanksiya qərarına sərt reaksiya verərək, bunun qeyri-qanuni və ədalətsiz olduğunu bəyan edib.
Crossmedia.az “Anka Xəbər” agentliyinə istinadla xəbər verir ki, İran Xarici İşlər Nazirliyinin nümayəndəsi İsmayıl Bəkayi ABŞ-nin qərarını pisləyib:
“Yeni administrasiyanın İranın iqtisadi tərəfdaşları ilə qanuni ticarətini əngəlləmək cəhdi qeyri-qanuni və beynəlxalq hüquqa ziddir”.
ABŞ-nin sanksiyaları gəmilərin beynəlxalq sularda hərəkətini birbaşa qadağan etmir, lakin onların fəaliyyətini çətinləşdirmək üçün zəruri dəstək xidmətlərinə çıxışlarını məhdudlaşdırır.
Nicat Rüstəmzadə
23:42 07.02.2025
Oxunuş sayı: 3129
