Meksika sərhədə 10 min əsgər göndərib
ABŞ prezidenti Donald Trampın Meksikadan idxala 25 faiz əlavə gömrük rüsumunu bir ay müddətinə dayandırmasından sonra sərhəddə aktivlik yaranıb.
Crossmedia.az xarici mətbuata istinadən xəbər verir ki, Meksika hökuməti narkotik ticarəti ilə mübarizə aparmaq üçün ABŞ sərhədinə 10 min Milli Qvardiyaçı göndərib.
Tixuana sərhədində patrul xidməti göstərən Milli Qvardiyanın lideri Xose Luis Santos İza mətbuata açıqlamasında "Sərhəddə daimi nəzarət olacaq. Bu əməliyyat ilk növbədə narkotik vasitələrin, xüsusilə də fentanilin Meksikadan ABŞ-a daşınmasının qarşısını almaq üçündür"- deyə o, qeyd edib.
Meksika prezidenti Klaudiya Şeynbaum və Tramp bazar ertəsi telefon danışığında yeni tarifləri müzakirə ediblər. Görüşdən sonra verdiyi açıqlamada Şeynbaum narkotik qaçaqmalçılığı ilə mübarizə üçün ABŞ sərhədinə 10 min Milli Qvardiyaçı yerləşdirəcəklərini, görüş zamanı gömrük vergilərinin dayandırılmasını təklif etdiyini və Trampın bunu qəbul etdiyini bildirib. Tramp Meksikaya tətbiq edilən yeni tarifləri bir ay müddətinə dayandıracağını açıqlayıb və bu müddət ərzində iki ölkənin daha çox danışıqlar aparacağını bildirib.
14:22 06.02.2025
Oxunuş sayı: 2511
