“Alphabet” (Google) 2024-cü ilin son rübündə gəlirlərini açıqladı
“Google” və ona məxsus digər şirkətlərin çətir şirkəti olan “Alphabet”, hər dövr olduğu kimi, 2024-cü ilin son rübündə əldə etdiyi gəlirləri açıqlayıb. Son vaxtlar Çin və ABŞ arasındakı gərginlikdən təsirlənən “Google”, buna baxmayaraq, əvvəlki illə müqayisədə 12 % artım əldə etməyi bacarıb.
Crossmedia.az xarici KİV-ə istinadən xəbər verir ki, “Alphabet” 2024-cü ilin son rübündə ümumilikdə 96,47 milyard dollar gəlir əldə edib. Şirkətin müxtəlif gəlir mənbələri olsa da, 2023-cü ilin son rübü ilə müqayisədə 12 faiz böyüməyə nail olub. Lakin şirkət yalnız bir sahədə zərər edib.
2023-cü ilin dördüncü rübündə 86,31 milyard dollar gəlir əldə edən “Google”, 2024-cü ilin eyni dövründə bu rəqəmi 96,47 milyard dollara yüksəldə bilib. Şirkətin gəlirlərinin artmasının əsas səbəbi ilin sonuna doğru müşahidə olunan yüksək tələbat ola bilər. Bildiyiniz kimi, noyabr ayında keçirilən endirim kampaniyaları və yeni ilin yaxınlaşması istifadəçilərin axtarış həcmini artırır.
“Alphabet”in CEO-su Sundar Pichai açıqlamasında bildirib:
“Dördüncü rüb, süni intellekt sahəsində liderliyimiz və ümumi iş tempimiz sayəsində güclü keçdi. Məhsulları və modelləri hər zamankından daha sürətli hazırlayır, sınaqdan keçirir və bazara təqdim edirik. Hesablama və səmərəliliyin artırılması sahəsində mühüm irəliləyişlər əldə edirik. Axtarış sahəsində ‘AI Overviews’ və ‘Circle to Search’ kimi yeniliklər istifadəçi əlaqəsini gücləndirir. Süni intellektlə gücləndirilmiş ‘Google Cloud’ portfelimiz müştərilərin daha böyük tələbi ilə qarşılaşır. ‘YouTube’ isə axın izləmə müddəti və podkast sahəsində liderliyini qoruyur.”
Bundan əlavə, “YouTube” sahəsində də yüksək gəlir əldə edən “Alphabet”, buradan 10,47 milyard dollar, “Cloud” xidmətlərindən isə 11,96 milyard dollar gəlir qazanıb.
Nərgiz Camalzadə
10:35 06.02.2025
Oxunuş sayı: 3291
