Əhməd əl-Şəra Türkiyəyə səfər edib – Ankara zirvəsində mühüm mövzular müzakirə olunacaq
Suriyanın keçid dövrünün prezidenti Əhməd əl-Şəra bu gün rəsmi səfər çərçivəsində Türkiyədədir. Bu, 2011-ci ildən sonra Suriya dövlət başçısının Türkiyəyə ilk səfəri hesab olunur.
Crossmedia.az xarici KİV-ə istinadən xəbər verir ki, Ankara zirvəsində bir sıra mühüm məsələlərin müzakirə ediləcəyi gözlənilir. Bunlara PKK-nın ləğvi, işğal altındakı neft və qaz quyularının mərkəzi administrasiyaya təhvil verilməsi, ABŞ qoşunlarının bölgədən çıxarılması və Türkiyənin mövcud bazalarının Suriya ordusuna verilməsi daxildir.
Səfər çərçivəsində Əhməd əl-Şəra və Türkiyə Prezidenti Rəcəb Tayyib Ərdoğan arasında ikitərəfli əməkdaşlıq sazişlərinin imzalanması planlaşdırılır. Eyni zamanda, Suriyanın yeni liderinin Ərdoğanı rəsmi olaraq Dəməşqə dəvət edəcəyi bildirilib.
Qeyd edək ki, Əhməd əl-Şəra Suriyada Bəşər Əsəd administrasiyasının devrilməsindən sonra keçid hökumətinin rəhbəri seçilib. Bu səfər, onun ilk xarici səfəri kimi xüsusi əhəmiyyət daşıyır.
11:25 04.02.2025
Oxunuş sayı: 10570
