Azərbaycanda akademik avarçəkmə üzrə federasiya birinciliyi keçirilib
Azərbaycanda ilk dəfə akademik avarçəkmə üzrə konsept trenajorda federasiya birinciliyi keçirilib.
Crossmedia.az Azərbaycan Kanoe və Avarçəkmə Federasiyasının (AKAF) mətbuat xidmətinə istinadən xəbər verir ki, birincilikdə 30-dan çox idmançı mübarizə aparıb.
Kişilər arasında Bəhmən Nəsiri ən yaxşı nəticəni göstərib. O, 2000 metr şərti məsafəni 5.49.9 dəqiqəyə başa vurmaqla həm də dünya konsept yarışlarında ən yaxşılar sırasında yer alıb. Belə ki, sonuncu dünya çempionatının nəticələri ilə müqayisədə Nəsirinin nəticəsi 4-cü olub.
Murad Sadıxov ikinci, Ziya Məmmədzadə üçüncü yeri tutub.
1000 metr məsafədə 2007-2010-cu il təvəllüdlü oğlanlar arasında Məhəmməd Həsənov birinci, Sabit Abdullayev ikinci, Ümid Abbaszadə 3-cü olub.
500 metr məsafədə 2010-2013-cü il təvəllüdlü oğlanların mübarizəsində Ruslan Fərəcov bütün rəqiblərini üstələyib. Şamil Şəfizadə ikinci, Yusif Əliyev üçüncü pillədə qərarlaşıb.
2007-2010-cu il təvəllüdlü qızlar arasında 500 metr məsafəyə yarışda Valeriya Vaskovska fəxri kürsünün ilk pilləsinə qalxıb. Sara Mirzəyeva ikinci, Fatimə Məhərrəmli üçüncü olub.
Qaliblər AKAF tərəfindən diplomla mükafatlandırılıb.
13:46 03.02.2025
Oxunuş sayı: 3000
