Şamil Ayrım : "Qaro Paylanın anti-Azərbaycan bəyanatları Türkiyənin siyasətinə ziddir"
Türkiyə-Azərbaycan parlamentlərarası dostluq qrupunun rəhbəri Şamil Ayrım Azərbaycana qarşı bəyanatlarla çıxış edən 27-ci çağırış Türkiyə parlamentinin deputatı, etnik erməni Qaro Paylanı sərt tənqid edib.
Crossmedia.az xəbər verir ki, türkiyəli millət vəkili sosial şəbəkədəki səhifəsində Paylanın mövqeyini pisləyən yazı dərc edib.
“Qaro Paylanın “Azərbaycana qarşı durmaq üçün Ermənistana 3-5 il vaxt lazımdır” kimi son dərəcə əsassız sözlərinin regionun reallıqları ilə heç bir əlaqəsi yoxdur”, - deyən Ş.Ayrım Azərbaycan Prezidenti İlham Əliyevin yanvarın 28-də nəqliyyat məsələlərinə həsr olunmuş müşavirədə səsləndirdiyi fikirləri xatırladıb.
“Prezident İlham Əliyev Azərbaycan xalqının Zəngəzuru unutmadığını və unutmayacağını bildirib, həmçinin 1920-ci ilin noyabrında sovet hökumətinin Qərbi Zəngəzuru azərbaycanlılardan aldığını və bununla da Azərbaycan xalqına qarşı cinayət törətdiyini xatırladıb. Dövlət başçısı vurğulayıb ki, Azərbaycanın Ermənistana qarşı heç bir ərazi iddiası yoxdur”, - deyə türkiyəli deputat qeyd edib.
Şamil Ayrım ermənilər tərəfindən Qərbi Azərbaycan ərazisindən qovulmuş yüz minlərlə sakinin beynəlxalq hüquq normalarına uyğun olaraq öz doğma yurdlarına ləyaqətli və təhlükəsiz qayıtmaq üçün tam hüquqa malik olduğunu vurğulayıb.
Türkiyəli deputat yazıb: “Regionda uzunmüddətli sülh üçün İrəvan İkinci Qarabağ müharibəsindən sonra imzalanmış üçtərəfli Bəyanatın bütün bəndlərini, o cümlədən Zəngəzur dəhlizinin açılması öhdəliyini yerinə yetirməlidir”.
O qeyd edib ki, Qaro Paylanın anti-Azərbaycan bəyanatları Türkiyənin Qafqaz regionunda sülhün təmin edilməsinə yönəlmiş siyasətinə ziddir.
14:20 02.02.2025
Oxunuş sayı: 2712
