Elm və təhsil

AZƏRTAC-ın nümayəndə heyəti BDU-da olub

Yanvarın 31-də Azərbaycan Dövlət İnformasiya Agentliyinin (AZƏRTAC) İdarə Heyətinin sədri Vüqar Əliyevin rəhbərlik etdiyi nümayəndə heyəti Bakı Dövlət Universitetində (BDU) olub.
Crossmedia.az xəbər verir ki, BDU-nun rektoru Elçin Babayev qonaqlara son illər universitetdə həyata keçirilən yeniliklər barədə məlumat verib, ölkədaxili və beynəlxalq əməkdaşlığın, işəgötürənlərlə əlaqələrin prioritet xarakter daşıdığını bildirib.
Rektor qeyd edib ki, BDU-nun Jurnalistika fakültəsi ölkədə jurnalist hazırlayan əsas bazadır. Son illərdə universitetin Medianın İnkişafı Agentliyi, Audiovizual Şura, Mətbuat Şurası da daxil olmaqla, müxtəlif media qurumları ilə səmərəli əməkdaşlığı yaranıb. Jurnalistika fakültəsində MEDİA, Mətbuat Şurası, “ARB24”, “Xalq qəzeti”nin xüsusi otaqları açılıb. Bu otaqların hər biri tələbə jurnalistlər üçün nəzəri biliklərin praktikada tətbiqi baxımından əvəzsiz rol oynayır. Ölkəmizin ilk və ən böyük agentliyi AZƏRTAC-la BDU-nun müxtəlif istiqamətlərdə əməkdaşlıq, birgə layihələr həyata keçirmək imkanlarının olduğunu deyən E.Babayev bunun dövlətin informasiya təhlükəsizliyinə fayda verəcəyini bildirib.
AZƏRTAC-ın İdarə Heyətinin sədri Vüqar Əliyev isə diqqətə çatdırıb ki, son illərdə agentlikdə informasiya siyasəti yeni səpkidə qurulub. Səkkiz dildə operativ xəbərlər yayan, 60-a yaxın xarici media qurumu ilə əməkdaşlıq edən və 24 ölkədə müxbir məntəqəsi olan AZƏRTAC kadr bazasını daim yeniləyir, gənclərə üstünlük verir. Bu baxımdan BDU ilə əməkdaşlıq hər iki quruma fayda verə bilər.
Görüşdə iki qurum arasında əməkdaşlığın genişləndirilməsi və yeni layihələrlə bağlı müzakirələr aparılıb.