Avropada Rusiya qazının bərpası müzakirə edilir
Avropa İttifaqında (Aİ) Ukraynadakı vəziyyətin tənzimlənməsi çərçivəsində Rusiyanın qaz tədarükünün bərpası məsələsi müzakirə edilir.
Crossmedia.az “Financial Times”-a istinadən xəbər verir ki, Avropa rəsmi şəxsləri, Rusiya qazının boru kəmərləri ilə bərpa olunub-olunmamalı olduğunu müzakirə edir. Bu addım Ukraynadakı müharibənin həlli üzrə mümkün razılaşma çərçivəsində həyata keçirilə bilər.
Hazırda Avropaya Rusiya qazının yeganə tədarük yolu “Türk axını” boru kəməridir. “FT”-nin məlumatına görə, Avropada qazın qiyməti ABŞ-dən üç-dörd dəfə bahadır. Boru kəmərləri ilə qaz tədarükünün bərpası tərəfdarları, bunun enerji qiymətlərini aşağı salacağını və Rusiya ilə danışıqlara başlamağa səbəb olacağını bildirirlər.
Almaniya və Macarıstanın bəzi rəsmi şəxsləri bu təklifi irəli sürüblər. Bəzi Avropa paytaxtları bu təklifi dəstəkləyib. Lakin, bu təşəbbüs Brüssel və Şərqi Avropa ölkələrindən müəyyən rəsmi şəxsləri narahat edib. Həmçinin, bəzi maye qaz təchizatçıları, Ukrayna vasitəsilə qaz nəqli bərpa edildiyi təqdirdə, məhsullarının rəqabət qabiliyyətinin azalacağından narahatdırlar.
2025-ci il yanvarın 1-dən “Qazprom” Ukrayna vasitəsilə Avropaya qaz tədarükünü dayandırıb. “Qazprom”un açıqlamasına görə, Ukrayna ilə tranzit müqaviləsinin müddəti başa çatdığından, qaz tədarükünün bərpası mümkünsüzdür.
Gültac Mehdizadə
16:18 30.01.2025
Oxunuş sayı: 6136
