Gürcüstan - Aİ münasibətləri daha da gərginləşəcək- ŞƏRH
Gürcüstanın Baş naziri İrakli Kobaxidze Avropa Şurası Parlament Assambleyasının (AŞPA) ölkədə yeni parlament seçkilərinin keçirilməsi və “siyasi məhbusların” azad olunması ilə bağlı qəbul etdiyi qətnaməyə sərt reaksiya verib. Baş nazir qətnaməni “tamamilə absurd” adlandıraraq, bunu Avropa qurumlarının böhran içində olduğunun göstəricisi kimi qiymətləndirib.
İrakli
Kobaxidze yerli “İmedi” telekanalına verdiyi açıqlamada bunları deyib:
“Bu qərar Avropa bürokratiyasının kifayət qədər çətin vəziyyətdə olduğunu sübut edir. Bu, həm Brüsselə, həm də Strasburqa aiddir. Bunun başqa bir təzahürü isə ədalətsizlikdən çox, tamamilə absurd bir qərar idi.”
AŞPA-nın qətnaməsinə cavab olaraq, Gürcüstanın bu qurumdakı nümayəndə heyəti fəaliyyətini dayandırıb. Gürcüstan hakimiyyəti bunu ölkənin suverenliyinə və daxili işlərinə müdaxilə cəhdi kimi qiymətləndirir.
Mövzunu Crossmedia.az-a dəyərləndirən Qafqaz Strateji Araşdırmalar Mərkəzinin (KAFKASSAM) rəhbəri, politoloq Hasan Oktay məsələ ilə bağlı diqqətçəkən fikirlər səsləndirib:
“2008-ci il avqustun 8-dən Avropa İttifaqı (Aİ) ilə Gürcüstan arasındakı münasibətlər gərgin atmosferdə davam edir. Xüsusilə son seçkilər öncəsi Aİ seçkilərə təsir göstərmək üçün bəzi qərarlar qəbul edərək, xalqı Avropa yönümlü bir hökumətin seçilməsinə yönləndirməyə çalışıb. Lakin Gürcüstanda keçirilən seçkilərdə mövcud baş nazirin hakimiyyəti davam etdirməsi təşkilat üçün kritik vəziyyət kimi qiymətləndirilib. Bu səbəbdən Aİ və AŞPA Gürcüstanın daxili işlərinə qarışaraq yenidən seçkilərin keçirilməsini tələb etdi. Baş nazir isə bu qərara etiraz olaraq AŞPA-dan çıxmaq qərarı verdi və Avropa qurumlarını məqsədlərindən uzaqlaşmaqda və səmərəsizlikdə günahlandırdı”.
H.
Oktay əlavə edib ki, bu qərar Gürcüstan-Aİ münasibətlərini daha da gərginləşdirəcək:
“Xüsusilə ABŞ-də Donald Trampın hakimiyyəti dövründə Gürcüstan üzərindəki təzyiqlər artacaq və ehtimal ki, hökumətin devrilməsi üçün zəmin yaradılacaq. 1991-ci ildən bəri Avropa və ABŞ Ukrayna və Gürcüstanla bağlı olduqca həssas və məqsədli siyasətlər həyata keçirir. İndiki vəziyyətdə Gürcüstan iki yol qarşısındadır: ya ABŞ və Avropa ilə əlaqələri kəsərək Rusiyaya yönələcək, ya da Avropa və ABŞ təzyiqləri artıraraq hökuməti devirmək və yeni seçkilər keçirmək üçün çalışacaq. Bu, Ukrayna nümunəsində olduğu kimi, hərbi yox, diplomatik və psixoloji üsullarla həyata keçiriləcək”.
Qətnamənin
Gürcüstanın Avropa ilə münasibətlərinə və demokratik inkişafına nə kimi təsirlər
göstərəcəyi isə diqqətlə izlənir.
Maral
Şahverdili
14:26 30.01.2025
Oxunuş sayı: 4882
