Zərdab rayonunda şəhid Abbasov Ağaqardaşın anım mərasimi keçirilib
Vətən müharibəsinin şəhidi, Zərdab rayonunun Hüseynxanlı kənd sakini Abbasov Ağaqardaş İlham oğlunun şəhidlik zirvəsinə ucalmasından 4 il ötür. Bu münasibətlə rayonda anım mərasimi təşkil olunub. Tədbirdə rayon icra hakimiyyəti başçısının müavini Pərvin Mahmudova, idarə, müəssisə və təşkilatların kollektivlərinin üzvləri, şəhid ailələri, müharibə iştirakçıları, ictimaiyyət nümayəndələri iştirak ediblər.
Crossmedia.az xəbər verir ki, mərasimində çıxış edən P.Mahmudova bildirib: “Ağaqardaş Abbasov torpaqlarımızın azadlığı uğrunda canını fəda edərək şəhidlik zirvəsinə ucaldı. Biz onun qəhrəmanlığı qarşısında baş əyirik və daim onu ehtiramla anırıq. Müzəffər Ali Baş Komandan, cənab Prezident İlham Əliyevin rəhbərliyi ilə Azərbaycan Ordusu 44 günlük Vətən müharibəsində tarixi zəfər qazandı. Bu qələbə şəhidlərimizin qanı və canı bahasına əldə olundu. Onların göstərdiyi şücaət Azərbaycan xalqının mübarizlik rəmzinə çevrildi. Bu gün ölkə rəhbərliyi şəhid ailələrinə, qazilərimizə hər zaman diqqət və qayğı ilə yanaşır. Prezident İlham Əliyevin rəhbərliyi ilə aparılan siyasət nəticəsində şəhid ailələrinin sosial müdafiəsi gücləndirilir, onların rifahı üçün ardıcıl tədbirlər həyata keçirilir. Biz şəhidlərimizi heç vaxt unutmayacağıq! Onların qəhrəmanlığı gələcək nəsillərə nümunə olacaq. Ruhları şad olsun!”.
Sonra şəhidin məzarı ziyarət olunub, məzarı önünə gül dəstələri düzülüb. Azərbaycan Respublikasının ərazi bütövlüyü uğrunda canlarından keçmiş şəhidlərimizin ruhlarına dualar oxunub.
12:40 29.01.2025
Oxunuş sayı: 10870
