Türkiyə PKK-ya qarşı kritik əməliyyatlara hazırlaşır - ŞƏRH
Suriyada baş verən son hadisələr, Türkiyənin regional və beynəlxalq siyasətində yeni bir mərhələnin başlanğıcını qoyub. Türkiyənin Suriyada dominant mövqelərə çıxması, onun həm Rusiya, həm də Qərb ölkələri ilə münasibətlərində əhəmiyyətli dəyişikliklərə səbəb olub. Bu dəyişikliklər, xüsusilə Qərb ilə ortaq maraqların və ziddiyyətlərin olduğu bir dövrdə, Türkiyənin Yaxın Şərqdəki güc balansını formalaşdırmaqda daha fəal rol oynamağa başladığını göstərir.
Türkiyənin sərhəd bölgələrində PKK ilə mübarizəsi və Suriyada həyata keçirdiyi əməliyyatlar, həm də ABŞ və digər güclərlə əlaqələrinə təsir etməyə davam edir. Bu hadisələrin inkişafı, bölgənin gələcəyini formalaşdıracaq əsas amillərdən biri olaraq önə çıxır.
Siyasi
şərhçi Aqşin Kərimov Crossmedia.az-a açıqlamasında bildirib ki, Türkiyə
Suriyada baş verən son hadisələrin fonunda Yaxın Şərqdə siyasi və təhlükəsizlik
arxitekturasının formalaşdırılmasında əhəmiyyətli mövqelər əldə edib: “Türkiyənin
Suriyada dominant mövqelərə çıxması, onun Rusiya, Qərb və Çinlə münasibətlərinə
yenidən baxmasına səbəb olur. Əsəd rejiminin devrilməsindən sonra Suriyadakı
mövcud düzən Türkiyənin beynəlxalq münasibətlərinə ciddi təsir edir. Türkiyənin xüsusilə Qərblə münasibətlərində həm toqquşan, həm də birləşən tərəfləri var ”.
Siyasi şərhçiyə görə, Türkiyə Suriya Milli Ordusunun dəstəyi ilə PKK-nın mövqelərinə müxtəlif istiqamətlərdən hücumlar təşkil etməyə çalışır. Sonra kritik mərhələdə Türkiyə Ordusunun sərhəd boyu paralel əməliyyatlara başlaması planlaşdırılır.
“Gələcəkdə hadisələrin inkişafı PKK-nın Suriyadakı varlığı ilə birbaşa bağlı olacaq. Türkiyə PKK-ya qarşı mübarizədə mühüm nəticələr əldə edə bilər və bu nəticələr ABŞ-nin Türkiyənin mövqeyini qəbul etməsinə gətirib çıxara bilər”. – deyə analitik əlavə edib.
Maral Şahverdili
15:22 28.01.2025
Oxunuş sayı: 14002
