Donald Tramp xarici yardımı dayandırır?
ABŞ-nin Prezidenti Donald Tramp şənbə günü xarici ölkələrə Vaşinqtonun yardımını dayandırdığını təsdiqləyib.
“İlk gündən kabinetimin hər bir üzvünə inflyasiyanı məğlub etmək və gündəlik həyatın xərcini aşağı salmaq üçün bütün səlahiyyətlərindən istifadə etməyi tapşırdım. Biz qiymətləri aşağı salmaq istəyirik. Federal işə qəbul prosesini dondurdum, federal tənzimləmələri dondurdum, xarici yardımı dondurdum,” o, Las Veqas, Nevada ştatında keçirilən mitinqdə bildirib.
İnflyasiyaya qarşı mübarizəyə yönəlmiş digər tədbirlər sırasında Tramp, ABŞ hökumətinin səmərəliliyini artırmaqdan məsul olacaq yeni bir ABŞ agentliyi – DOGE (Hökumət Səmərəliliyi Departamenti) yaradılmasını qeyd edib.
Bundan əvvəl Politico yazmışdı ki, ABŞ-nin Dövlət katibi Marko Rubio mövcud xarici yardım qrantlarının əksəriyyətinə maliyyə ayırmağı 90 gün müddətinə dayandırıb. Qəzetin məlumatına görə, sənəd müəyyən şərh imkanı verir və bəzi istisnaları nəzərdə tutur. İsrail və Misir üçün hərbi maliyyələşdirmə proqramları davam edəcək, lakin Ukrayna, İordaniya və Tayvana yardım ehtimal ki, dayandırılacaq. Xarici yardım proqramlarının davam etdirilməsi, dəyişdirilməsi və ya dayandırılması ilə bağlı qərarlar Dövlət katibi tərəfindən aparılan nəzərdən keçirmədən sonra qəbul ediləcək. Daha sonra Reuters xəbər verib ki, ABŞ Beynəlxalq İnkişaf Agentliyi (USAID) Ukraynaya kömək göstərilməsi ilə bağlı layihələri dayandırıb.
Maral Şahverdili
12:53 26.01.2025
Oxunuş sayı: 3431
