İsrail ordusu Cenində hücumları şiddətləndirir: Ölənlər var
İsrail ordusu işğal altındakı İordan çayının qərb sahilində hücumları şiddətləndirir. Cenin qaçqın düşərgəsinə əlavə qüvvələr yeridilib.
Crossmedia.az xarici KİV-ə istinadən xəbər verir ki, İsrail ordusu işğal altındakı İordan çayının qərb sahilinin şimalında yerləşən Cenin şəhəri və ona bitişik qaçqın düşərgəsinə qarşı hücumlarını daha da şiddətləndirib. Bu, ardıcıl dörd gündür ki, davam edən hücumlar çərçivəsində baş verir.
Anadolu Agentliyinə danışan şahidlər İsrail qüvvələrinin düşərgəyə əlavə qüvvələr yeritdiyini və bölgədə toqquşmalarla partlayış səslərinin əks-səda verdiyini bildiriblər.
Hücumun başlanğıcından etibarən İsrail buldozerlərinin sistematik şəkildə düşərgədəki infrastruktur və ticarət obyektlərini dağıtdığı bildirilib.
Şahidlər son üç gün ərzində fələstinlilərə məxsus evlərin dağıdıldığını və ağır texnikanın yeni strukturları məhv etmək üçün istifadə olunduğunu vurğulayıblar.
Bundan əlavə, İsrail ordusu onlarla fələstinlini saxlayaraq yaxınlıqdakı istintaq mərkəzlərinə aparıb.
Məlumata görə, artıq dörd gündür davam edən İsrail hücumları nəticəsində azı 12 nəfər həlak olub, 40-dan çox insan yaralanıb.
Qeyd edək ki, İsrailin Qəzzaya qarşı müharibəsi nəticəsində 2023-cü il oktyabrın 7-dən 47.300-dən çox insan həlak olub, onların əksəriyyəti qadınlar və uşaqlardır. Həmçinin, 111.500-dən çox insan yaralanıb.
İsrail qüvvələri tərəfindən işğal altındakı ərazilərdə azı 873 fələstinli öldürülüb və 6.700-dən çox insan yaralanıb.
Fatimə Məmmədova
15:36 25.01.2025
Oxunuş sayı: 11545
