Xarici xəbərlər

Aİ Suriyadan Rusiya bazalarının çıxarılmasını tələb edir

Avropa İttifaqı (Aİ) Dəməşqə bildirib ki, Aİ-nin Suriyaya qarşı sanksiyaları ləğv etməsini nəzərdən keçirməsi üçün ölkə ərazisindəki bütün xarici hərbi mövcudluq, o cümlədən Rusiya hərbi bazaları aradan qaldırılmalıdır.
Crossmedia.az xəbər verir ki, xarici KİV bu barədə məlumat yayıb.
“Biz bu məsələyə yaxından nəzarət edirik. Artıq Suriyadakı yeni hakimiyyət orqanlarını məlumatlandırmışıq ki, normallaşma prosesi bütün xarici mövcudluğun - istər hərbi, istərsə də digər formada - aradan qaldırılmasından asılıdır. Orada üç ölkə var və onlardan biri də Rusiyadır. Buna görə də, biz bu məsələdə israr edirik. Onlar isə bunu nəzərdən keçirəcəklərini bildiriblər", – yüksək rütbəli Aİ rəsmisi bildirib.
Belə ki, Rusiya Suriyada iki hərbi obyektə sahibdir – Tartus dəniz logistika bazası və Latakiyanın 20 km cənub-şərqində yerləşən Hmeymim aviabazası. Tartusdakı sovet bazası 1971-ci ildə ikitərəfli saziş çərçivəsində yaradılıb. Rusiya 30 sentyabr 2015-ci ildə Suriyadakı hava qüvvələrini İŞİD terror qruplaşmasına (Rusiyada qadağan olunmuş təşkilat) qarşı mübarizə üçün yerləşdirib.
Qeyd edək ki, Tartus vilayətinin gömrük idarəsinin rəhbəri Riyad Cudi Suriya qəzetinə - "Al Vatan"a açıqlamasında deyib ki, yeni hakimiyyət orqanları 2019-cu ildə Rusiya şirkəti ilə bağlanan Tartus limanının idarə olunması üzrə investisiya müqaviləsini ləğv edib.
Fatimə Məmmədova