Avropa Parlamenti İrandan bunu tələb etdi
Cümə axşamı Avropa Parlamenti İranda insan hüquqlarının pozulması ilə bağlı qətnamə qəbul edib.
Crossmedia.az xarici mediaya istinadən xəbər verir ki, Qətnamə 556 lehinə, 6 əleyhinə və 42 bitərəf səslə qəbul edilib.
Qətnamədə Avropa Parlamentinin üzvləri İranda ölüm cəzasına kəskin etirazlarını ifadə edərək, onun dərhal ləğvini tələb ediblər. Onlar xüsusilə hüquq müdafiəçisi Paxşan Əzizi və Vrişa Moradiyə çıxarılan ölüm hökmlərini pisləyir və onların qeyd-şərtsiz azadlığa buraxılmasını, həmçinin ölüm hökmündə olan ən azı 56 siyasi məhbusun azad edilməsini tələb ediblər.
Avropa Parlamentinin deputatları həmçinin Almaniya-İran vətəndaşı Cəmşid Şarməhdin qətlini qətiyyətlə pisləyir və İrandakı İslam rejimini onun ölüm şəraiti ilə bağlı təfərrüatları açıqlamağa çağırıb.
Qətnamə İranın girov diplomatiyasını kəskin şəkildə pisləyir. Avropa Parlamenti deputatları İran rejimini Fransa vətəndaşları Olivier Grondeau, Cécile Kohler və Jacques Paris və İsveç-İran vətəndaşı Əhmədrza Cəlali də daxil olmaqla bütün Aİ vətəndaşlarını azad etməyə çağırır.
Avropa Parlamentinin deputatları həmçinin Şuradan İslam İnqilabı Keşikçiləri Korpusunu terror təşkilatı kimi tanımağa və Aİ sanksiyalarını İranda insan haqlarının pozulmasına görə məsuliyyət daşıyan bütün şəxslərə şamil etməyə çağırdıqlarını təkrarlayırlar.
15:58 24.01.2025
Oxunuş sayı: 4232
