Xarici xəbərlər
Visa Qırğızıstandakı banklardan birinə məhdudiyyətlər tətbiq edib
Beynəlxalq ödəniş sistemi “Visa”, ABŞ Maliyyə Nazirliyinin “anti-Rusiya sanksiyalarından yayınmaya kömək etdiyinə” görə sanksiya tətbiq etdiyi Qırğızıstanın “Керемет Банк”-ı tərəfindən buraxılan kartların istifadəsinə məhdudiyyətlər qoyub.
Crossmedia.az xəbər verir ki, bu barədə “Vesti.kg” resursu həmin kredit təşkilatına istinadən məlumat yayıb.
Qeyd olunur ki, artıq bu bank tərəfindən buraxılan “Visa” kartlarının sahibləri onları xarici qurğularda istifadə edə bilməyəcəklər. Kartlar yalnız bankın özünün POS-terminal, ödəniş terminalı və bankomatlarında xidmət göstərəcək.
Daha əvvəl məlumat verilmişdi ki, ABŞ Xəzinədarlıq Departamentinin Xarici Aktivlərə Nəzarət İdarəsi (OFAC) tərəfindən sanksiya siyahısına daxil edilən “Керемет Банк” bu qərarı şikayət etməyi planlaşdırır. Bankın nümayəndələri vurğulamışdılar ki, onlar “milli qanunvericilik və beynəlxalq hüquq normalarına ciddi şəkildə riayət edərək şəffaflıq və məsuliyyət prinsiplərinə sadiqdirlər”.
Keçən ilin avqust ayında “Керемет Банк” bir sıra Rusiya banklarının mobil tətbiqləri və Rusiyanın milli ödəniş sistemi operatoru olan “АО НСПК” vasitəsilə iki istiqamətdə pul köçürmələrini dayandırdığını elan etmişdi.
Nərgiz Camalzadə
20:14 22.01.2025
Oxunuş sayı: 7416
