Çində iki dəhşətli hücumun təqsirkarları edam edildi
Çində keçən ilin noyabr ayında baş verən iki ağır hücumun təqsirkarları edam edilib. Bu hücumlar ölkədə son illərin ən ölümcül hadisələri kimi qeydə alınıb.
Crossmedia.az xarici KİV-ə istinadən xəbər verir ki, 62 yaşlı Fan Veyqiu, 11 noyabr tarixində Zhuhai şəhərində stadionun qarşısında idmanla məşğul olan insanlara avtomobilini sürərək ən azı 35 nəfərin həyatını itirməsinə və onlarcasının yaralanmasına səbəb olub.
Rəsmilərin sözlərinə görə, Fan bu hərəkəti boşanmasından sonra əmlakın bölünməsi ilə bağlı yaranan narazılıq səbəbindən törədib. O, hadisə yerində saxlanılıb və özünə xəsarət yetirdiyi məlum olub.,
Dekabr ayında məhkəmə Fanı "ictimai təhlükəsizliyi təhlükəyə atmaqda" təqsirli bilib və məhkəmənin qərarı ilə ona ölüm hökmü verilib. Məhkəmədən bir ay sonra Fan edam edilib.
Digər hücum isə 16 noyabr tarixində baş verib. Belə ki, 21 yaşlı Xu Ciajin Wuxi şəhərindəki universitetində bıçaqla hücum edərək 8 nəfəri öldürüb və 17 nəfəri yaralayıb. Polis onun zəif imtahan nəticələrinə görə diplom ala bilmədikdən sonra bu cinayəti törətdiyini bildirib.
Xu, cinayəti "heç bir tərəddüd etmədən" etiraf edib. 17 dekabrda məhkəmənin qərarı ilə ona ölüm hökmü oxunub.
Çində ictimai zorakılığın artması
Rəsmilər son illərdə Çində bu cür hücumların artdığını bildirirlər. 2024-cü ildə ölkə üzrə bu tipli 19 hücum qeydə alınıb. Hücumların çoxunda şəxsi narazılıqları səbəb göstərən təqsirkarlar tanımadıqları insanları hədəf alırlar.
Zhuhai və Wuxi hadisələrindən qısa müddət sonra Changde şəhərində başqa bir şəxs avtomobilini bir məktəbin qarşısındakı uşaqlar və valideynlərin üstünə sürüb, nəticədə 30 nəfər xəsarət alıb.
Həmin şəxs, Huang Ven, ailə münaqişəsi və investisiya itkiləri səbəbindən bu addımı atdığını etiraf edib. O, keçən ay şərti ölüm cəzasına məhkum edilib. Əgər növbəti iki ildə başqa cinayət törətməzsə, cəzası ömürlük həbsə dəyişdirilə bilər.
Emil Bağızadə
08:35 20.01.2025
Oxunuş sayı: 19829
