Regional sülhün zəmanəti: Bakı-Ankara əlaqələri
Azərbaycanın xarici işlər naziri Ceyhun Bayramov və Türkiyənin xarici işlər naziri Hakan Fidan arasında yanvarın 18-də keçirilən görüş iki ölkə arasındakı strateji müttəfiqliyin möhkəmləndirilməsi və regional məsələlərin həlli istiqamətində birgə fəaliyyətin gücləndirilməsi baxımından mühüm əhəmiyyət daşıyır. Görüş zamanı əsas müzakirə mövzuları Azərbaycan-Ermənistan münasibətlərinin normallaşdırılması prosesi, Türk Dövlətləri Təşkilatı çərçivəsində əməkdaşlıq və bölgədə təhlükəsizlik məsələləri olub.
Ölkəmizin baş diplomatı Ceyhun Bayramov görüşdə Ermənistanın Azərbaycan ərazilərinə qarşı davam edən iddiaları və bu siyasətin regionda sülh prosesini pozan əsas amillərdən biri olduğunu vurğuladı. Ermənistanın konstitusiyasında Azərbaycana qarşı ərazi iddialarının hələ də qalması və bu istiqamətdə sistematik işlərin görülməsi regionda gərginlikləri artırır. Görüşdə Azərbaycanın sülhə nail olmaq üçün göstərdiyi səylərin qarşısında duran maneələr geniş şəkildə müzakirə edildi. Bu, həm də Türkiyənin bölgədəki sülh təşəbbüslərində Azərbaycanın yanında olmasının önəmini göstərir.
Hakan Fidan görüşdə Türk Dövlətləri Təşkilatı çərçivəsində ortaq fəaliyyətlərin vacibliyini vurğuladı və bu əməkdaşlığın 2025-ci ildə daha da dərinləşəcəyini bildirdi. Azərbaycanın və Türkiyənin lider rolu oynadığı bu platforma, türk dövlətlərinin inteqrasiyasını və siyasi, iqtisadi əlaqələrinin güclənməsini təmin edir. Bu cür əməkdaşlıq yalnız tərəfdaş ölkələr üçün deyil, ümumilikdə region üçün də sabitlik və inkişaf təmin etmək potensialına malikdir.
Görüş həmçinin enerji, nəqliyyat, ticarət və təhlükəsizlik sahələrində ikitərəfli əməkdaşlığın genişləndirilməsini də əhatə edib. Cənubi Qafqazda geosiyasi dəyişikliklər fonunda Azərbaycan-Türkiyə əməkdaşlığı həm regional, həm də qlobal miqyasda mühüm əhəmiyyət daşıyır. Şuşa Bəyannaməsi ilə daha da möhkəmləndirilən bu əlaqələr, hər iki dövlətin strateji maraqlarını qorumaqla yanaşı, bölgənin sabitliyinə töhfə verir.
Baş tutmuş diskussiyalarda həmçinin Cənubi Qafqazda sabitliyin təmin olunması üçün Azərbaycan və Türkiyənin birgə təhlükəsizlik siyasətləri müzakirə edildi. Azərbaycan və Türkiyə Ermənistanın destruktiv siyasətinə baxmayaraq, regionda sülh və əməkdaşlıq mühitinin formalaşmasına çalışır. Bu məqsədlə hər iki ölkə sülh müqaviləsinin imzalanması prosesinə dəstəyini davam etdirir.
Nəticə etibarilə bu görüş bir daha sübut etdi ki, Azərbaycan-Türkiyə münasibətləri strateji müttəfiqlikdən daha dərinə gedən qardaşlıq əlaqələrinə əsaslanır. Hər iki dövlət, tarixi və mədəni bağlarının verdiyi güc ilə yalnız ikitərəfli münasibətlərini deyil, həm də regionda sülh və təhlükəsizlik məsələlərini koordinasiya etməkdə qətiyyətlidir.
Ağahüseyn Abbaslı
15:46 20.01.2025
Oxunuş sayı: 11278
