Tramp Vaşinqtona gəldi: Andiçmə mərasiminə hazırlıq
Donald Tramp andiçmə mərasimindən əvvəl Ağ Evin qonaq iqamətgahında məskunlaşıb.
Crossmedia.az xarici KİV-ə istinadən xəbər verir ki, ABŞ-nin seçilmiş prezidenti Donald Tramp 20 yanvarda keçiriləcək andiçmə mərasimi ərəfəsində Ağ Evin qonaqlar üçün nəzərdə tutulan iqamətgah olan Bleyer Housa yerləşib.
Məlumata görə, Tramp həyat yoldaşı Melaniya və kiçik oğlu ilə birlikdə Florida ştatından xüsusi hökumət təyyarəsi ilə Vaşinqtona uçub. Təyyarə Vaşinqton yaxınlığındakı Dalles Beynəlxalq Hava Limanında eniş edib. Tramp həyat yoldaşı və qonaqları ilə birlikdə atəşfəşanlığı izləyib, ardınca Bleyer Housa qayıdıb.
Andiçmə mərasimi üçün rekord məbləğdə – 150 milyon dollar vəsait toplandığı bildirilib. Belə ki, toplanan vəsaitlə bağlı tam hesabatın 90 gün ərzində ABŞ-nin Federal Seçki Komissiyasına təqdim ediləcəyi gözlənilir.
Donald Tramp yanvarın 17-də sərt soyuq hava şəraitinə görə andiçmə mərasiminin Kapitolinin qapalı zalında keçiriləcəyini təsdiqləyib. O, həmçinin prezident paradının yaxınlıqdakı idman arenasında təşkil ediləcəyini açıqlayıb.
Qeyd edək ki, tədbirdə iştirak edəcək yüksək vəzifəli şəxslər və qonaqlar xüsusi nəqliyyat vasitələri ilə Kapitoliyə çatdırılacaq.
Fatimə Məmmədova
09:59 19.01.2025
Oxunuş sayı: 14704
