İlon Mask ABŞ-ın müflis ola biləcəyi barədə xəbərdarlıq edib
ABŞ, federal borcun artdığı bir zamanda hökumət xərclərini azaltmaq üçün “böyük və təcili” addımlar atılmasa, müflis olma təhlükəsi ilə üz-üzə qala bilər. Bu xəbərdarlığı SpaceX-in baş direktoru və X platformasının sahibi İlon Mask edib.
Crossmedia.az İran mediasına istinadən xəbər verir ki, Mask Prezident seçilmiş Donald Tramp vəzifəsinə başladıqdan sonra federal xərcləri azaltmaq üçün yaradılan Hökumət Səmərəliliyi Departamentinə həmsədr təyin ediləcək.
Daha əvvəl də ABŞ-ın müflis olma ehtimalı barədə narahatlığını ifadə edən Mask, cümə günü X platformasında paylaşım edərək bu xəbərdarlığını bir daha təkrarlayıb.
“Amerikanın müflis olmaması üçün böyük və təcili addımlar atılmalıdır,” Mask federal xərclərin nəzarətsiz artımı ilə bağlı DOGE-nin paylaşımına cavab olaraq yazıb.
DOGE qeyd edib ki, federal hökumətə son hərtərəfli baxış 1984-cü ildə, milli borcun 1,6 trilyon dollar və borcun ÜDM-ə nisbətinin təxminən 38% olduğu vaxt həyata keçirilib. Bu gün həmin nisbət 121%-i keçib, milli borc isə 36 trilyon dolları ötüb. Xəzinədarlıq katibi Canet Yellenin məlumatına görə, borc limiti Trampın inaqurasiyasından bir gün sonra çatacaq.
Trampın yenidən seçki kampaniyası zamanı Mask hökumət israfını azaltmağı və federal bürokratiyanı sadələşdirməyi vəd etmişdi. O, əvvəlcə təxminən 7 trilyon dollarlıq federal büdcədən 2 trilyon dolların azaldılmasını təklif etmişdi. Lakin son müsahibəsində Mask gözləntiləri bir qədər yumşaldaraq bu rəqəmi “ən yaxşı halda əldə ediləcək nəticə” adlandırıb.
“2 trilyon dolları hədəf alsanız, 1 trilyon dolları əldə etmək üçün yaxşı bir şansınız var,” Mask X platformasında Stagwell CEO-su Mark Penn ilə söhbəti zamanı deyib. O, federal xərclərin 1-2 trilyon dollar azalmasının mal və xidmətlərin çıxışı ilə pul təklifini tarazlaşdıracağını, inflyasiyanı azaltmağa kömək edəcəyini bildirib.
Nabat Fərzəliyeva
13:09 18.01.2025
Oxunuş sayı: 16331
