G7 Yaxın Şərq məsələsində israrlıdır: İki dövlətli həll yolu əsasdır
G7 ölkələrinin liderləri İsrail və Həmas arasında əldə olunan atəşkəs razılaşmasını “əhəmiyyətli bir inkişaf” adlandıraraq, onun tam icrasının vacibliyini vurğulayıblar.
Crossmedia.az xarici KİV-ə istinadən xəbər verir ki, Avropa Şurasının saytında dərc olunan bəyanatda deyilir: “Biz, G7 liderləri, Həmas və sionist rejim arasında əldə edilən atəşkəs razılaşmasını tam dəstəkləyirik”.
Razılaşmada əsirlərin azad olunmasını, təcili humanitar yardımın çatdırılmasını və mülki şəxslərin evlərinə qayıtmasını asanlaşdıracağı qeyd olunub.
G7 liderləri bütün tərəfləri humanitar yardımların təhlükəsiz və sürətli çatdırılmasını təmin etməyə, mülki şəxsləri və humanitar işçiləri qorumağa çağırıb. Beynəlxalq humanitar qanunların hörmət edilməsinin vacibliyi qeyd edilib.
Bəyanatda, həmçinin, Qəzzanın bərpasının beynəlxalq təşkilatların nəzarəti altında və tam koordinasiya ilə həyata keçirilməsinin əhəmiyyəti vurğulanıb.
Liderlər iki dövlətli həll yolu əsasında sülhün və təhlükəsizliyin təmin olunmasına dəstək verdiklərini bir daha bəyan ediblər.
Gültac Mehdizadə
12:50 18.01.2025
Oxunuş sayı: 16474
