Planetin Yaxın Şərq “düyünü”: Atəşkəs niyə davamlı olmur?
İsrail Silahlı Qüvvələri ilə HƏMAS arasında toqquşmalar intensiv şəkildə davam edir. Beynəlxalq ictimaiyyətin vasitəçiliyi ilə müvəqqəti atəşkəs razılaşmaları əldə edilsə də, tərəflər arasındakı gərginlik və qarşılıqlı hücumlar səngimir. Bu çərçivədə bu gün yenidən atışmaların baş verməsi məsələnin nə qədər mürəkkəb və həll olunmamış vəziyyətdə olduğunu bir daha göstərir.
Planetin Yaxın Şərq “düyünü” ilə bağlı Crossmedia.az-a danışan politoloq Aytən Qurbanova xatırladıb ki, İsrail ilə HƏMAS arasında əldə olunmuş razılaşma hələ qüvvəyə minməyib:
“Əgər İsrail hökuməti bugün razılaşmanı təsdiq etsə, yanvarın 19-dan etibarən rəsmi atəşkəs elan edilmiş hesab olunacaq. Hər bir halda atəşkəs rəsmi halda qüvvəyə minmiş olsa belə, bu, Qəzza bölgəsində davamlı sülhün zəmanəti deyil. Münaqişənin tarixinə nəzər yetirdikdə aydın şəkildə müşahidə edə bilərik ki, tərəflər arasında belə atəşkəslər çox olub. Amma təəssüflər olsun ki, onların etibarlılıq müddəti hər dəfə bir az daha qısalır”.
Politoloqun fikrincə, ölkənin yeni seçilmiş prezidenti Donald Trampın İsrailə münasibətdə daha himayəedici mövqedən çıxış etdiyini nəzərə alsaq, onun hakimiyyəti dönəminə bir neçə gün qalmış əldə olunmuş belə bir atəşkəsin ömrünün nə qədər ola biləcəyi ilə bağlı haqlı tərəddüdlər diqqətdən yayınmamalıdır: “Nəticə etibarilə, İsrail ilə HƏMAS arasında əldə edilmiş atəşkəsin gələcəyi ilə bağlı nikbin danışmaq çətin olsa da, indiki məqamda Qəzza bölgəsində atəşin dayandırılması və girovların azad edilməsi ilə bağlı razılıq kifayət qədər önəmli addımdır”.
Fidan Hacızadə
13:08 16.01.2025
Oxunuş sayı: 18513
