“Ukraynanın sülhə məcbur edilməsi ehtimalı artır” - RƏY
ABŞ-nin dövlət katibi Entoni Blinken və müdafiə naziri Lloyd Ostin "The New York Times" qəzetində Ukraynadakı müharibənin dayandırılması və davamlı sülhün təmin edilməsi üçün güc vasitəsilə diplomatik danışıqların vacibliyini vurğulayıblar. Məqalədə ABŞ-nin və müttəfiqlərinin Ukraynaya dəstəyinin önəmi, həmçinin Rusiyanın ciddi çıxılmaz vəziyyəti ətraflı təhlil edilib.
Mövzu ilə bağlı Crossmedia.az-a açıqlama verən politoloq Əli Zülfüqaroğlu qeyd edir ki, ABŞ-nin hazırkı hökumətinin əsas məqsədi Ukraynanın ərazi bütövlüyünü qorumaq və ya NATO-ya üzvlüyünü təmin etməkdən çox, Ukraynanı bir vasitə kimi istifadə edərək Rusiyanı zəiflətmək olub. Onun sözlərinə görə, “Ukraynada müharibənin başlaması məhz bu strategiya çərçivəsində həyata keçirildi. Rusiya təhrik edildi ki, Ukrayna ərazilərini işğal etsin və bu proses baş verdi”.
Zülfüqaroğlu əlavə edir ki, müharibənin sonrakı mərhələsində əsas məqsəd Ukrayna xalqının və dövlətçiliyinin hesabına Rusiyaya qarşı uzunmüddətli təzyiqlər yaratmaq və bununla ölkə daxilində qeyri-sabitlik yaradaraq hakimiyyət dəyişikliyinə nail olmaq idi. O vurğulayıb ki, ABŞ Rusiyada marionet bir hökumət qurmağı planlaşdırırdı, lakin bu planlar gözlənilən nəticəni vermədi. “Əksinə, Avropa İttifaqı və ABŞ ciddi iqtisadi və hərbi problemlərlə üzləşdi, həmçinin dövlətlərarası münasibətlər sistemində dərin böhranlar ortaya çıxdı. Bunun nəticəsində ABŞ-nin özünə qarşı yeni ittifaqlar yarandı, məsələn, Çin-Rusiya və Çin-İran yaxınlaşmaları,” – politoloq bildirib.
Politoloq qeyd edib ki, Bayden administrasiyasının siyasəti ABŞ daxilində də ciddi tənqidlərə məruz qalıb. Xüsusilə, keçmiş prezident Donald Trump və tərəfdarları bu siyasətləri Birləşmiş Ştatlara qarşı yeni ittifaqların yaranmasına səbəb olmaqda ittiham ediblər. Trump isə hakimiyyətə gələcəyi təqdirdə Rusiya ilə münasibətləri normallaşdırmağa və Ukraynaya maliyyə yardımını azaltmağa söz verib.
Zülfüqaroğlu əlavə edir ki, “Trump hakimiyyətə gəldikdə bu vədləri yerinə yetirməyə məcbur olacaq, əks halda həm tərəfdarlarının etimadını itirəcək, həm də Respublikaçıların hakimiyyətdə qalması çətinləşəcək”.
Politoloq hesab edir ki, ABŞ-ın növbəti hakimiyyəti Rusiya ilə münasibətləri normallaşdırmaq üçün Ukraynaya verilən dəstəyi azalda bilər və diqqət daha çox Çinlə iqtisadi mübarizəyə yönələcək. “Bu səbəbdən Ukraynanın sülhə məcbur edilməsi ehtimalı artır. Prezident Zelenskinin hakimiyyətdə olduğu dövrdə Ukrayna-Rusiya sülh danışıqlarının baş tutacağı ehtimal edilmir. Zelenski hakimiyyətdən uzaqlaşdırılarsa, Ukrayna ya ərazi itkiləri ilə barışmalı olacaq, ya da böyük güzəştlərə getməyə məcbur qalacaq,” – deyə o bildirib.
Əli Zülfüqaroğlu vurğulayıb ki, “Hazırda Ukraynaya dəstək yalnız onun təslim olmaması üçün verilir, əsas məqsəd isə Rusiyanın zəiflədilməsini davam etdirməkdir. Qələbə qazanmaq üçün verilən bu dəstəklər Rusiyanın gücünü azaltmaq strategiyasına xidmət edir. Lakin bu plan baş tutmadı və növbəti mərhələ Zelenskinin hakimiyyətdən getməsi və təslimçi danışıqların başlaması ola bilər.”
Nihat Tahirov
10:47 16.01.2025
Oxunuş sayı: 9504
