Vyetnamla Rusiya arasında nüvə enerjisi sahəsində müqavilə imzalandı
Vyetnam və Rusiya müqavilə imzaladı.
Crossmedia.az xarici KİV-ə istinadən xəbər verir ki, Vyetnam və Rusiya nüvə enerjisi sahəsində əməkdaşlığı genişləndirmək məqsədilə müqavilə imzalayıb. Hanoy enerji müstəqilliyinə nail olmaq və 2050-ci ilə qədər istixana qazı emissiyaları hədəflərini qarşılamaq üçün nüvə proqramını bərpa etməyi planlaşdırır.
Müqavilə Rusiyanın dövlətə məxsus "Rosatom" nüvə enerjisi şirkəti ilə Vyetnamın dövlət enerji qurumu EVN arasında imzalanıb.
Cənub-Şərqi Asiya ölkəsi Vyetnam, 2016-cı ildə artan xərclər və təhlukəsizlik problemləri səbəbindən dayandırdığı iki nüvə elektrik stansiyası tikintisini yenidən gündəmə gətirib. Bu addımın məqsədi enerji müstəqilliyinə nail olmaq və 2050-ci ilə qədər istixana qazı emissiyalarını azaltmaqdır.
Rusiya Baş naziri Mişustin, Vyetnamın Baş naziri Pham Minh Çinhlə ikitərəfli danışıqlar zamanı iki ölkə arasındakı güclü tərəfdaşlığa diqqət çəkib. “Vyetnam, Cənub-Şərqi Asiyada Rusiyanın vacib tərəfdaşıdır”, - deyə Mişustin bildirib: “Bu gün sizinlə 2030-cu ilə qədər Rusiya və Vyetnam arasında əməkdaşlıq üçün əhatəli planı müzakirə edəcəyik.”
Səfər zamanı Mişustin həmçinin Vyetnamın Kommunist Partiyasının rəhbəri To Lam ilə və Milli Məclisin sədri Tran Thanh Man ilə görüşüb. O, çərşənbə günü Vyetnam Prezidenti Luong Cuong ilə görüşməyi planlaşdırıb.
"Rosatom"un baş direktoru Aleksey Lixaçev Hanoya gəlib və şirkətin Vyetnamda nüvə elektrik stansiyaları və tədqiqat mərkəzləri tikməkdə, həmçinin Rusiya nüvə texnologiyasını paylaşmaq və lokalizasiya etməkdə kömək etməyə hazır olduğunu bildirib.
Nüvə enerjisi razılaşmasından əlavə, Rusiya Vyetnama dəniz tədqiqatları üçün elmi araşdırma gəmisi təqdim etməyi qəbul edib.
Qeyd edək ki, Vyetnam və Rusiya 1950-ci ildən bəri diplomatik əlaqələr qoruyur və Soyuq Müharibə dövründən bəri yaxın müttəfiqlərdir. Bu uzunmüdətli əlaqənin təsirini Vyetnamın şəhərlərində müşahidə etmək mümkündür. Burada sovet dövrünə aid yaşayış binaları müasir göydələnlərlə yanaşı dayanır.
Fatimə Məmmədova
15:22 14.01.2025
Oxunuş sayı: 17252
