Xarici xəbərlər

Lavrov təyyarə qəzasından danışdı - “Qara qutu”lar çox maraqlı məlumatlar verib

Rusiyanın xarici işlər naziri Sergey Lavrov Moskva ilə Bakı arasındakı münasibətlərdən danışarkən Aktauda baş verən təyyarə qəzasına da toxunub.

Crossmedia.az xarici KİV-ə istinadən xəbər verir ki, o, bu barədə mətbuat konfransında danışıb.

"Rusiya və Azərbaycan istənilən məsələləri həll edə bilər, o cümlədən Qazaxıstanın Aktau şəhəri yaxınlığında “Azərbaycan Hava Yolları”na (AZAL) məxsus təyyarənin qəzaya uğraması kontekstində Bakının Rusiyanın istintaqda iştirakına verdiyi dəstəyi yüksək qiymətləndiririk" - deyə Lavrov bildirib.

Həmçinin Lavrov jurnalistləri AZAL-ın təyyarə qəzası ilə bağlı araşdırmanın nəticələrini gözləməyə və faciə haqqında məlumat yaymamağa çağırıb. O, həmin məlumatların “qara qutu”ların məlumatları ilə faktiki olaraq təsdiqini tapmadığını söyləyib.

Lavrov bildirib ki, Aktauda qəzaya uğrayan təyyarənin “qara qutu”ları çox maraqlı məlumatlar verib.

Onun sözlərinə görə, təhqiqat başa çatana qədər gözləmək vacibdir və “qara qutu” məlumatları hazırda yayılan versiyaların çoxunu dəstəkləmir.

Xatırladaq ki, dekabrın 25-i Bakı-Qroznı marşrutu üzrə uçan "Embraer 190" sərnişin təyyarəsi Aktaunun hava limanından 3 km məsafədə qəzaya uğrayıb.

Aktau şəhərində qəzaya uğrayan “Embraer 190” təyyarəsində 62 sərnişin, 5 ekipaj üzvü olmaqla, ümumilikdə 67 nəfər olub. Hadisə nəticəsində 38 nəfər həlak olub, 29 nəfər isə yaralanıb.

Aybəniz Səfərova

🖨 Çap et

12:03 14.01.2025

Oxunuş sayı: 15670