TDT ölkələri arasında ticarətin inkişafında mühüm addımlar atılır - Açıqlama
Türk dünyasında ticarət əlaqələrinin genişlənməsi və inkişafı üçün bir sıra mühüm addımlar həyata keçirilib. Bu tədbirlər davam etdirilir və Azərbaycan üçün müsbət perspektivlərə yol açır. Həmçinin ticarət əlaqələri ölkələr arasında logistik imkanların təkmilləşməsinə gətirib çıxarır.
Mövzu ilə bağlı beynəlxalq ticarətin asanlaşdırılması üzrə ekspert Ceyhun Nəcəfli Crossmedia.az-a açıqlama verib.
Ekspertin sözlərinə görə, Türk Dövlətləri Təşkilatı (TDT) üzv ölkələr arasında ticarətin asanlaşdırılması və sürətləndirilməsi məqsədilə bir sıra mühüm təşəbbüslər həyata keçirir:
“Bu istiqamətdə 2022-ci ildə qəbul edilən Ticarətin Asanlaşdırılması üzrə Strategiya Sənədi, üzv dövlətlər arasında ticarət və gömrük prosedurlarının sadələşdirilməsi və uyğunlaşdırılmasını hədəfləyir. Azərbaycanda bu strategiyanın icrasını təmin etmək məqsədilə Biznes Mühiti və Beynəlxalq Reytinqlər üzrə Komissiyanın Beynəlxalq ticarət işçi qrupu əlaqələndirici qurum kimi müəyyən edilib. Bu işçi qrupu, ticarət prosedurlarının təkmilləşdirilməsi və beynəlxalq reytinqlərdə ölkəmizin mövqeyinin yaxşılaşdırılması istiqamətində fəaliyyət göstərir. Komissiyanın əsas vəzifələri arasında biznes mühitinin əlverişliliyinin artırılması, investisiya cəlbediciliyinin yüksəldilməsi və qanunvericiliyin təkmilləşdirilməsi yer alır. Beynəlxalq ticarət işçi qrupu isə sərhəddə ticarət üzrə dövlət xidmətlərinin səmərəliliyinin artırılması, ticarət əməliyyatlarının rəqəmsallaşdırılması və logistika səmərəliliyinin yüksəldilməsi kimi məsələlər üzərində çalışır”.
C.Nəcəfli qeyd edib ki, göstərilənlərlə yanaşı, TDT-yə üzv ölkələr arasında ticarətin asanlaşdırılması sahəsində həyata keçirilən digər perspektivli təşəbbüslər üzrə aşağıdakı tədbirləri göstərmək olar:
"Sadələşdirilmiş Gömrük Dəhlizi: 2022-ci ilin noyabrında Səmərqənddə keçirilən Zirvə Görüşündə Türk Dövlətləri Təşkilatının hökumətləri arasında sadələşdirilmiş gömrük dəhlizinin yaradılması haqqında Saziş imzalanıb və 2024-cü ilin noyabrında qüvvəyə minib. Bu təşəbbüs gömrük prosedurlarını asanlaşdırmaq, rəqəmsal məlumat mübadiləsini inkişaf etdirmək və tranzit müddətlərini qısaltmaqla, Türk dünyası arasında ticarəti asanlaşdırmağı hədəfləyir. Orta Dəhlizin Rəqəmsallaşdırılması: Orta Dəhliz üzərində rəqəmsallaşma və ticarətin asanlaşdırılması istiqamətində bir sıra layihələr icra olunur. Bu layihələr logistika səmərəliliyinin artırılmasına və xərclərin azaldılmasına təsir edəcək. Türk İnvestisiya Fondunun Yaradılması: 2022-ci ildə TDT-nin ilk ortaq maliyyə qurumu olan Türk İnvestisiya Fondu yaradılıb. Fond, üzv dövlətlər arasında ticari-iqtisadi əməkdaşlığı gücləndirmək və birgə layihələr həyata keçirmək məqsədi daşıyır. Bu tədbirlər nəticəsində üzv ölkələr arasında ticarət əlaqələrinin güclənməsi, iqtisadi əməkdaşlığın dərinləşməsi və regionda iqtisadi inkişafın sürətlənməsi gözlənilir”.
Müsahibin sözlərinə görə, bu, xüsusilə, ticarət prosedurlarının sadələşdirilməsi və rəqəmsallaşdırılması, logistika xərclərinin azalması və ticarət dövriyyəsinin artması ilə nəticələnəcək:
“Azərbaycan üçün isə bu addımların müsbət təsirləri arasında tranzit potensialının artırılması, iqtisadiyyatın diversifikasiyası və yeni iş yerlərinin yaradılması kimi faydalar yer alır. Bütün bu təşəbbüslər Azərbaycanın regionda iqtisadi mövqeyini gücləndirəcək və beynəlxalq ticarətdə rolunu artıracaq”.
Fidan Hacızadə
08:23 14.01.2025
Oxunuş sayı: 11322
