"Trampın bəyanatları Yaxın Şərqdə vəziyyəti mürəkkəbləşdirir"
ABŞ-nin seçilmiş prezidenti Donald Tramp yenidən diqqətləri öz çıxışı ilə cəlb edib. O, Qəzzada girovların yanvarın 20-nə qədər azad edilmədiyi təqdirdə, Yaxın Şərqdə böyük gərginliklərin yaşanacağını bildirib. Trampın bəyanatına görə, bu vəziyyət nə HƏMAS, nə də bölgədəki digər tərəflər üçün müsbət nəticə vəd etmir. Onun bu sərt çıxışı, Yaxın Şərqdə sülhün təmin olunması və Qəzza məsələsində mövcud böhranın daha da dərinləşə biləcəyi ilə bağlı suallar yaradır.
Mövzu ilə bağlı "Atlas" Araşdırmalar Mərkəzinin rəhbəri, politoloq Elxan Şahinoğlu Crossmedia.az-a açıqlamasında bildirib ki, Tramp prezident seçildikdən sonra xarici və təhlükəsizlik siyasətinin konturlarını izah etməyə çalışır.
Elxan Şahinoğlu qeyd edib: "Donald Trampın bəyanatları arasında gözlənilməz və xəyali görünən mesajlar da var. Panama kanalının nəzarətə götürülməsi, Kanadanın Amerika ilə birləşdirilməsi, Meksika körfəzinin adının dəyişdirilməsi, hətta Qrelandiyanın Amerikanın tərkibinə qatılması kimi fikirlər diqqət çəkir. Bu ideyalar bir az fantastik görünə bilər, amma nəticədə Trampın ciddi addımlar atmağa hazırlaşdığı aydın görünür".
HƏMAS mövzusunda isə politoloq vurğulayıb: "Tramp bir neçə dəfə xəbərdarlıq edib ki, andiçmə mərasiminə qədər girovlar azad edilməsə, ABŞ HƏMAS əleyhinə çox ciddi tədbirlər görəcək. Onun İsraili dəstəklədiyi bəyanatları göstərir ki, bu boş sözlər deyil. İsrail-Amerika strateji əməkdaşlığı Tramp rəhbərliyində daha da güclənəcək və HƏMAS-a qarşı ciddi hərbi planlar həyata keçirilə bilər. İsrail özü də bu istiqamətdə addımlar atmağa hazırdır, lakin HƏMAS-ın təhdidlərini nəzarət altına almağa çalışacaq".
Şahinoğlu Trampın çıxışlarını həm İsrailə, həm də ABŞ-nin xarici siyasətinə təsir edəcək strateji bəyanatlar kimi qiymətləndirib. Onun fikrincə, bu ritorika Yaxın Şərqdəki vəziyyəti daha da mürəkkəbləşdirə bilər.
Trampın bu bəyanatları regional və beynəlxalq səviyyədə ciddi müzakirələrə səbəb olub. HƏMAS-ın girov məsələsindəki mövqeyi, Tramp administrasiyasının sərt yanaşması və İsrail-Amerika əlaqələrinin güclənməsi bölgədəki gərginliyin artacağı ehtimalını gücləndirir.
Nihat Tahirov
14:34 13.01.2025
Oxunuş sayı: 19417
