Rusiya: Amerika istehsalı olan 8 ATACMS raketini vurduq
Rusiya Müdafiə Nazirliyindən verilən açıqlamada 4-10 yanvar tarixləri arasında Rusiya-Ukrayna müharibəsində Rusiya ordusunun fəaliyyəti ilə bağlı məlumat verilib.
Crossmedia.az xarici KİV-ə istinadən xəbər verir ki, pilotsuz uçuş aparatları (PUA) vasitəsilə hücumlar təşkil edilib. Bu hücumlar nəticəsində hərbi hava limanının infrastrukturu, PUA istehsal və saxlama mərkəzləri, silah-sursat anbarları və məntəqələrin vurulduğu bildirilib. Həmçinin ukraynalı əsgər və muzdluların müvəqqəti yerləşdiyi yerlər də hücuma məruz qalıb.
Açıqlamada, ABŞ istehsalı olan 8 ATACMS raketi, 41 HIMARS raketi, 5 Fransa istehsalı Hammer (idarə olunan bomba) və 689 PUA-nın Rusiya hava hücumundan müdafiə sistemləri tərəfindən vurulduğu bildirilib.
Luqansk vilayətində Nadiya, Donetsk vilayətində isə Kuraxovo və Daçenskoye qəsəbələri son bir həftə ərzində Rusiya ordusu tərəfindən işğal edilib. 91 Ukrayna əsgərinin isə əsir götürüldüyü qeyd olunur.
Açıqlamada, müharibənin əvvəlindən bu yana 652 təyyarə, 283 helikopter, 39 min 896 PUA, 590 hava hücumundan müdafiə raket sistemi, 20 min 467 tank və zirehli texnika, 20 min 385 haubitsa və minaatan və 30 min 135 ədəd hərbi maşının məhv edildiyi bildirilib.
Tərlan Əmrahova
17:14 10.01.2025
Oxunuş sayı: 15002
