Hakan Fidan: "Qəzzada atəşkəsə nail olmaq üçün səylərimizi davam etdiririk"
"Qəzzada atəşkəsə nail olmaq üçün səylərimizi davam etdiririk"
Crossmedia.az türk mətbuatına istinadən xəbər verir ki, bunu Türkiyənin xarici işlər naziri Hakan Fidan deyib.
Nazirin çıxışını təqdim edirik:
"Türkiyənin xarici siyasət gündəmi kifayət qədər genişdir. 2024-cü ili xüsusi edən şübhəsiz Suriyadakı hadisələrdir. Biz 2011-ci ildən səbirlə apardığımız siyasətlə ədaləti, haqqı müdafiə etmişik. Bu gün tarixin doğru tərəfində olmağımızla haqlı olaraq fəxr edirik. Deyə bilərəm ki, Suriya ilə bağlı hekayəmiz yeni başlayır. Qonşumuzun yenidənqurma və inkişaf səylərini dəstəkləməyə başladıq. Türkiyənin xarici siyasətinin əsas istiqamətini sülh və əməkdaşlıq təşkil edir. Qonşularımızdan və region ölkələrindən gözləntimiz də budur. Önümüzdəki dövr üçün ümidimiz Suriyanın ərazi bütövlüyünün keçid prosesini tamamlamaqdır.
Ölkəmizin bütün təhdidləri aradan qaldırmaq gücü və qətiyyəti var. Bir daha heç nə əvvəlki kimi olmayacaq. Terrorla mübarizəyə ikitərəfli münasibət bəsləyən ölkələr də terror hücumlarından dərs götürməlidir. DEAŞ-PKK-la eyni qətiyyətlə mübarizəmizi davam etdirəcəyik.
Fələstin məsələsi keçən il də gündəmimizdə qalmaqda davam etdi. Qəzzaya ən çox yardım göndərən ölkə bizik. Mayın 2-dən etibarən biz İsraillə ticarətimizi tamamilə dayandırmışıq. Beynəlxalq Cinayət Məhkəməsində işimiz var. Bizim təşəbbüslərimiz sayəsində daha 9 ölkə Fələstini tanıdı. Təkcə Livandakı atəşkəs bölgədəki gərginliyi aradan qaldırmadı. Qəzzada atəşkəsə nail olmaq üçün səylərimizi davam etdiririk. Yaxın Şərqdə davamlı sülh Fələstin və İsrail arasında iki dövlətli həll yolu ilə mümkündür. Türkiyə Fələstinli qardaşlarının yanında olmağa davam edir".
Fidan həmçinin Türkiyənin İraq və Yunanıstanla münasibətlərindən danışıb: "Biz İraqın təhlükəsizliyini və sabitliyini öz ölkəmizdən ayrı görmürük. İraqla müqavilə bazamızı gücləndirdik. Yunanıstanla fikir ayrılıqlarımızı həll etməyə davam edirik".
Aybəniz Səfərova
08:45 10.01.2025
Oxunuş sayı: 6325
