Latviya MDB vətəndaşları üçün daha sərt giriş tələbləri planlaşdırır
Latviya Parlamentinin Milli Təhlükəsizlik Komissiyası Seymin Rəyasət Heyətinə təqdim edilən "Miqrasiya haqqında" qanuna dəyişiklikləri təklif edib.
Crossmedia.az "Delfi"yə istinadən xəbər verir ki, bu düzəlişlər Rusiya, Belarus və digər MDB ölkələrinin vətəndaşlarından Latviyaya daxil olmamışdan əvvəl ətraflı səyahət məlumatı vermələrini tələb edəcək.
Qanun layihəsinin müəllifləri qeyd ediblər ki, Macarıstan kimi bəzi Şengen zonası ölkələri ruslara və belaruslara viza verərkən hərtərəfli yoxlama aparmırlar. Rusiyanın Ukraynaya təcavüzü fonunda Riqa hesab edir ki, Rusiya və Belarus vətəndaşları təhlükəsizliyə təhdid yarada və kəşfiyyat fəaliyyəti ilə məşğul ola bilərlər.
Təşəbbüsün bir hissəsi olaraq, Latviyaya səfər etmək istəyən ruslar və belaruslar əvvəlcədən xüsusi anket doldurmalı olacaqlar. Onlar səfərlərinin məqsədini, marşrutunu, qalma müddətini və yerini, əlaqə məlumatlarını, Rusiya dövləti və hüquq-mühafizə orqanları ilə əlaqələrini dəqiqləşdirməli olacaqlar.
Bu məlumatın təqdim edilməməsi və ya yalan məlumat verilməsi 2000 avroya qədər cərimə ilə nəticələnəcək. Diplomatlar və qısamüddətli rəsmi səfərlərdə olanlar üçün istisnalar olacaq.
Bundan əlavə, Komissiya təklif edir ki, MDB ölkələrinin vətəndaşları Latviyanın sərhəd zonasına yalnız Dövlət Təhlükəsizlik Xidmətinin icazəsi ilə buraxılsın.
08:05 10.01.2025
Oxunuş sayı: 12250
