Tramp və Putin görüşə hazırlaşır
ABŞ-ın yeni seçilmiş prezidenti Donald Tramp bildirib ki, Rusiya prezidenti Vladimir Putin onunla görüşmək istədiyini ifadə edib və hazırda bu görüşün hazırlıqları aparılır.
Crossmedia.az xəbər verir ki, bu barədə "Reuters" məlumat yayıb.
Tramp Florida ştatındakı Mar-a-Laqo iqamətgahında eyni partiyadan olan qubernatorlarla görüşü ərəfəsində jurnalistlərə açıqlama verib. O, görüşün nə zaman baş tutacağını dəqiqləşdirməyib.
"Putin görüşmək istəyir və biz bunu təşkil edəcəyik," – deyə Tramp qeyd edib. Lakin o, görüşün harada keçiriləcəyi və Çin lideri Si Tsinpin də bu görüşə qoşula biləcəyi ilə bağlı detalları açıqlamayıb.
"Bizim çoxlu insanlarla bir çox görüşlərimiz planlaşdırılıb, amma mən 20 yanvara qədər gözləməyi təklif edərdim," – deyə Tramp vurğulayıb. O, həmçinin Rusiya ilə Ukrayna arasındakı hərbi münaqişəyə son qoyulmasının vacibliyini qeyd edib.
Bundan əvvəl "Financial Times" Avropa rəsmilərinə istinadən məlumat yayıb ki, Trampın komandası Rusiya-Ukrayna münaqişəsinin həlli ilə bağlı yanaşmasını yenidən nəzərdən keçirir. Xüsusilə, münaqişənin altı ay ərzində həll olunma ehtimalı müzakirə olunur, baxmayaraq ki, Tramp əvvəllər müharibənin tez bir zamanda bitəcəyini bəyan etmişdi.
Emil Bağızadə
04:58 10.01.2025
Oxunuş sayı: 12785
