Xarici xəbərlər

İsrail Folklend adaları məsələsində Argentinaya dəstəyini artırır

İsrail Böyük Britaniya ilə münasibətlərdə yaranan gərginlik fonunda Folklend (Malvin) adaları ilə bağlı Argentina ilə yaxınlaşma istiqamətində addımlar atır.

Crossmedia.az xəbər verir ki, İsrailin Baş naziri Benyamin Netanyahunun Argentinanın Folklend adaları ilə bağlı danışıqların bərpası çağırışını dəstəkləmək üçün diplomatlara göstəriş verdiyi bildirilir. Lakin bu məlumat hələlik rəsmi şəkildə təsdiqlənməyib.

Məsələ Böyük Britaniyanın İordan çayının qərb sahilindəki İsrail yaşayış məntəqələrinə qarşı yeni sanksiyalar tətbiq etməsindən sonra aktuallaşıb.

İsrailin milli təhlükəsizlik naziri İtamar Ben-Qvir daha əvvəl Netanyahunu Argentinanın Folklend adaları üzərində suverenliyini tanımağa və Böyük Britaniyaya qarşı sanksiyalar tətbiq etməyə çağırıb.

Argentina uzun illərdir Britaniyanın nəzarətində olan adalara suverenlik iddiası irəli sürür və Londonla danışıqların bərpasını tələb edir.

İsrail və Böyük Britaniya arasında münasibətlər isə Londonun işğal altındakı İordan çayının qərb sahilində yaşayış məntəqələrinin genişləndirilməsinə qarşı tədbirləri fonunda gərginləşib.

Qeyd edək ki, İsrail hökumətinin Folklend adalarının suverenliyi ilə bağlı rəsmi mövqeyini dəyişdirdiyi hələ təsdiqlənməyib.

Mövzular:

İsrail Argentina Böyük Britaniya Benyamin Netanyahu Folklend adaları Malvin adaları İtamar Ben-Qvir

🖨 Çap et

14:00 24.10.2026

Oxunuş sayı: 63